KERALATop News

അണ്‍ലോക്ക് 4: കേരളത്തിലെ നിയന്ത്രണങ്ങള്‍ വ്യക്തമാക്കി ചീഫ് സെക്രട്ടറി

തിരുവനന്തപുരം: കേന്ദ്ര ആഭ്യന്തര മന്ത്രാലയം പുറപ്പെടുവിച്ച അണ്‍ലോക്ക് നാലാംഘട്ട മാര്‍ഗനിര്‍ദേശങ്ങള്‍ കേരളത്തിലും ബാധകമെന്ന് ചീഫ് സെക്രട്ടറി വിശ്വാസ് മേത്ത. സെപ്റ്റംബര്‍ ഒന്നുമുതലാണ് കേന്ദ്ര ആഭ്യന്തര മന്ത്രാലയം പുറപ്പെടുവിച്ച അണ്‍ലോക്ക് നാലിലെ നിയന്ത്രണങ്ങളും മറ്റും നിലവില്‍ വന്നത്. ഇതിന് അനുസൃതമായി തന്നെയാണ് സംസ്ഥാനത്തെയും നിയന്ത്രണങ്ങളെന്നാണ് ചീഫ് സെക്രട്ടറി വ്യക്തമാക്കിയിരിക്കുന്നത്. അണ്‍ലോക്ക് നാലാംഘട്ടം പ്രകാരം കണ്ടെയ്ന്‍മെന്റ് സോണുകളില്‍ ലോക്ക് ഡൗണ്‍ തുടരുകയും മറ്റു സ്ഥലങ്ങളില്‍ ഘട്ടങ്ങളായി ഇളവുകള്‍ അനുവദിക്കുകയും ചെയ്യും. എല്ലാ കളക്ടര്‍മാരും ജില്ലാ പോലീസ് മേധാവിമാരും പുതിയ മാര്‍ഗനിര്‍ദേശങ്ങളും നിയന്ത്രണങ്ങളും നടപ്പാക്കുന്നതായി ഉറപ്പുവരുത്തണമെന്ന് പുതിയ ഉത്തരവില്‍ നിര്‍ദേശിക്കുന്നുണ്ട്.

കൊവിഡ് വ്യാപനത്തെ അടിസ്ഥാനമാക്കി കണ്ടെയ്ന്‍മെന്റ് സോണുകള്‍ സംസ്ഥാന ദുരന്ത നിവാരണ അതോറിറ്റി നോട്ടിഫൈ ചെയ്യുന്ന നിലവിലെ രീതി തന്നെ തുടരാനാണ് തീരുമാനം. കണ്ടെയ്ന്‍മെന്റ് സോണില്‍ അധിക നിയന്ത്രണങ്ങള്‍ ആവശ്യമാണെങ്കില്‍ അതിനുള്ള നടപടി സ്വീകരിക്കാനുള്ള അധികാരം കളക്ടര്‍മാര്‍ക്ക് ഉത്തരവ് നല്‍കുന്നുണ്ട്.

കേന്ദ്ര, സംസ്ഥാന സര്‍ക്കാരുകള്‍ പുറത്തിറക്കുന്ന മാര്‍ഗനിര്‍ദേശങ്ങള്‍ക്കനുസരിച്ച് പോലീസ്, ആരോഗ്യ അധികൃതര്‍ ഏര്‍പ്പെടുത്തുന്ന നിയന്ത്രണങ്ങളുടെ നടപ്പാക്കല്‍ കളക്ടര്‍മാര്‍ ഉറപ്പാക്കേണ്ടതുമുണ്ട്. കേന്ദ്രം പുറത്തിറക്കിയ അണ്‍ലോക്ക് നാലാംഘട്ട മാര്‍ഗനിര്‍ദേശത്തിലും സ്‌കുളുകളും കോളേജുകളും അടഞ്ഞ് കിടക്കുമെന്നാണ് വ്യക്തമാക്കുന്നത്. സെപ്റ്റംബര്‍ ഏഴുമുതല്‍ മെട്രോ ട്രെയിനുകള്‍ക്ക് സര്‍വീസ് പുനഃരാരംഭിക്കാന്‍ കഴിയും. കര്‍ശന നിയന്ത്രണങ്ങളോടെയാണ് സര്‍വീസ്. സംസ്ഥാനത്തിന് പുറത്തേക്കുള്ള യാത്രയ്ക്കും ഇനി പ്രത്യേക നിയന്ത്രണങ്ങള്‍ ഇല്ല.

Tags
Show More

Related Articles

Back to top button
Close