KERALANEWS

ആരാണ് വിജയ് പി നായര്‍?


തിരുവനന്തപുരം: ഭാഗ്യലക്ഷ്മിയുടെയും കൂട്ടരുടെയും ആ ‘ഒറ്റ അടിയില്‍’ വെളിച്ചത്തായത് വിജയ് പി. നായരെന്ന വ്യാജ ഡോക്ടറുടെ തനിനിറമാണ്. അടി കിട്ടിയ ഉടന്‍ വിജയ് പി. നായരെ അനുകൂലിച്ച് നിരവധിപേര്‍ രംഗത്തുവന്നെങ്കിലും ഇയാളുടെ ‘തനിസ്വഭാവം’ അറിഞ്ഞതോടെ മലയാളികള്‍ മൂക്കത്തുവിരല്‍വച്ചു. വിജയ് പി. നായരുടെ യൂട്യൂബ് വീഡിയോകള്‍ കണ്ട ചിലരെല്ലാം ചോദിച്ചു, കിട്ടിയത് കുറഞ്ഞുപോയോ. എന്തായാലും അടികിട്ടിയതോടെ സോഷ്യല്‍ മീഡിയയില്‍ വിജയ് പി. നായര്‍ ‘ഹിറ്റായിരിക്കുകയാണ്’. ഗൂഗിള്‍ സെര്‍ച്ചിലും ഇയാളുടെ പേര് ഇടം പിടിച്ചു. എല്ലാവര്‍ക്കും അറിയേണ്ടത് ആരാണ് യഥാര്‍ത്ഥത്തില്‍ വിജയ് പി. നായര്‍ എന്നാണ്.
നാട്ടുകാര്‍ക്കും അറിയില്ല, ആരാണ് വിജയ് പി നായരെന്ന്! ആറു വര്‍ഷമായി വെള്ളായണി ചാപ്ര ഇടവഴിയിലാണ് വിജയ് പി നായരുടെ കുടുംബം വാടകയ്ക്ക് താമസിക്കുന്നത്. എന്നാല്‍ നാട്ടുകാര്‍ക്കോ ജനപ്രതിനിധികള്‍ക്കോ ഇയാളെക്കുറിച്ച് കാര്യമായ അറിവില്ല. ആരുമായിട്ടും സൗഹൃദംവച്ചു പുലര്‍ത്തിയിരുന്നില്ല. വീട്ടില്‍ അമ്മയും സഹോദരനുമുണ്ട്. അവിവാഹിതനായ സഹോദരന്‍ ജോലിക്കുപോകുന്നില്ലെന്നാണ് നാട്ടുകാര്‍ പറയുന്നത്. വെള്ളായണി പഞ്ചായത്ത് അംഗത്തിനും കുടുംബത്തെക്കുറിച്ച് കാര്യമായ അറിവില്ല. പോസ്റ്റുമാന്റെ സഹായത്തോടെയാണ് സ്പെഷല്‍ ബ്രാഞ്ച് ഇയാളുടെ വീട് കണ്ടെത്തിയത്. പോലീസ് സംഘം വീട്ടിലെത്തുമ്പോഴാണ് വിജയ് പി.നായര്‍ അവിടെ ഉണ്ടെന്ന് അയല്‍വാസികള്‍ പോലും അറിയുന്നത്. ഇയാളുടെ അമ്മ മാത്രമാണ് അപ്പോള്‍ വീട്ടിലുണ്ടായിരുന്നത്. വിജയ് അവിവാഹിതനാണെന്നാണ് പോലീസിനു ലഭിച്ചവിവരം. പക്ഷേ യൂട്വൂബില്‍ ഇടുന്ന വീഡിയോകള്‍ മുഴുവനും സ്ത്രീകളുമായി ബന്ധപ്പെടുന്ന വിഷയങ്ങളും

കണ്ണാടി കടകള്‍ക്ക് ലെന്‍സ് വില്‍ക്കുന്ന ജോലിയാണെന്നാണ് വിജയ് വീട്ടില്‍ പറഞ്ഞിരുന്നത് എന്ന് ഇയാളുടെ അമ്മ വ്യക്തമാക്കി. സ്റ്റാച്യു ഗാന്ധാരിയമ്മന്‍ കോവിലിനടുത്ത് വാടകയ്ക്കു താമസിക്കുന്ന വിജയ് ഇടയ്ക്ക് തന്നെ കാണാന്‍ വീട്ടിലെത്തുമായിരുന്നു. നാട്ടുകാരുമായി ഇടപഴകാതെ, തന്നെ കണ്ടശേഷം വൈകിട്ടോടെ ബൈക്കില്‍ മടങ്ങിപോകുകയായിരുന്നു പതിവ്. ഇയാളുടെ സഹോദരി നഗരത്തിലെവിടെയോ താമസമുണ്ടെന്നാണ് വിജയ് പി.നായരുടെ അമ്മ പോലീസിനോട് പറഞ്ഞത്. അവര്‍ വല്ലപ്പോഴും അമ്മയെ കാണാനെത്താറുണ്ടെങ്കിലും വീട്ടില്‍ താമസിക്കാറില്ല. ചെന്നൈയിലെ ‘ഗ്ലോബല്‍ ഹ്യൂമന്‍ പീസ് യൂണിവേഴ്സിറ്റി’ എന്ന വിദ്യാഭ്യാസ സ്ഥാപനത്തില്‍ നിന്നാണ് തനിക്ക് പിഎച്ച്ഡി ലഭിച്ചതെന്നാണ് ഇയാള്‍ അവകാശപ്പെട്ടിരുന്നത്. ഇവിടെ നിന്നും താന്‍ പിഎച്ച്ഡി സ്വീകരിക്കുന്നതായി കാണിക്കുന്ന ചിത്രങ്ങളും ഇയാള്‍ പങ്കുവച്ചിരുന്നു. എന്നാല്‍ ചെന്നൈയിലോ സമീപ പ്രദേശങ്ങളിലോ ഇങ്ങനെയൊരു സര്‍വകലാശാല നിലവിലില്ല. സര്‍വകലാശാലയുടേതായി കാണാനാകുന്ന വെബ് സൈറ്റില്‍, സ്ഥാപനത്തിന് കേന്ദ്ര വിദ്യാഭ്യസ വകുപ്പിന്റെയോ, യുജിസിയുടെയോ അനുമതി ലഭിച്ചിട്ടുള്ളതിനെ കുറിച്ചുള്ള വിവരങ്ങളുമില്ല. വ്യാജ യോഗ്യത കാട്ടി സൈക്കോളജിസ്റ്റ് എന്ന പേരുപയോഗിച്ച് തട്ടിപ്പ് നടത്തുന്നതിനെതിരെ ഇന്ത്യന്‍ അസോസിയേഷന്‍ ഒഫ് ക്ലിനിക്കല്‍ സൈക്കോളജിസ്റ്റ് ഇയാള്‍ക്കെതിരെ നിയമനടപടി ആരംഭിച്ചിട്ടുണ്ട്.

സിനിമയില്‍ സംവിധാനം പഠിക്കാന്‍ പോയ ശേഷം അധ്യാപകനായെന്നും അതിനു ശേഷമാണ് യു ട്യൂബര്‍ ആയതെന്നുമാണ് വിജയ് പി. നായര്‍ പോലീസിനോടു പറഞ്ഞത്. ചില സൂപ്പര്‍ ഹിറ്റ് സിനിമകളില്‍ താന്‍ പ്രവര്‍ത്തിച്ചിട്ടുണ്ടെന്നും, സിനിമകളുടെ പേരുള്‍പ്പെടെ പറഞ്ഞ് ഇയാള്‍ അവകാശവാദം ഉന്നയിക്കുന്നുണ്ട്. സിനിമ മേഖലയില്‍ പ്രവര്‍ത്തിക്കുന്നവരോടും ഇയാളെക്കുറിച്ച് പോലീസ് അന്വേഷിക്കുന്നുണ്ട്. പാരലല്‍ കോളജില്‍ അധ്യാപകനായി ജോലി ചെയ്തെന്നും അതിനുശേഷം അണ്ണാമലൈ യൂണിവേഴ്സിറ്റിയില്‍നിന്ന് ബിരുദം നേടിയെന്നും ഇയാള്‍ ചോദ്യം ചെയ്യലില്‍ പോലീസിനോട് വെളിപ്പെടുത്തി. കേസിനെ തുടര്‍ന്ന് വിജയ് പി.നായരുടെ അക്കൗണ്ട് യൂട്യൂബ് നീക്കം ചെയ്തു. വിജയ് പി നായര്‍ക്കെതിരെ ഐടി ആക്ടിലെ 67, 67 (എ) വകുപ്പുകള്‍ പ്രകാരം ജാമ്യമില്ലാ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. അശ്ലീല പദപ്രയോഗങ്ങളും പരാമര്‍ശങ്ങളുമാണ് വിജയ് പി. നായര്‍ തന്റെ യൂട്യൂബ് വീഡിയോയിലൂടെ നടത്തിയിരുന്നത്. നാലു മാസം മുന്‍പ് തുടങ്ങിയ ചാനലില്‍ സിനിമയും സ്റ്റോക്ക് മാര്‍ക്കറ്റിങ്ങുമായിരുന്നു വിഷയമായിരുന്നത്. പിന്നീടാണ് സ്ത്രീകളെ അപഹസിക്കുന്ന അശ്ലീല വീഡിയോകള്‍ ഇയാള്‍ സ്വയം തയാറാക്കി അവതരിപ്പിച്ചു തുടങ്ങിയത്.

Tags
Show More

Related Articles

Leave a Reply

Your email address will not be published.

Back to top button
Close