Movies

ഇതാണ് ഒറിജിനല്‍ കുഞ്ഞപ്പന്‍! റോബോട്ടിനുള്ളിലെ മനുഷ്യന്‍, വെളിപ്പെടുത്തി അണിയറ പ്രവര്‍ത്തകര്‍

ആന്‍ഡ്രോയ്ഡ് കുഞ്ഞപ്പന്‍ കണ്ടിറങ്ങിയ പ്രേക്ഷകരെല്ലാം പരസ്പരം ചോദിച്ച ആദ്യ ചോദ്യം ആ റോബോട്ട് ഒറിജിനലാണോ അതോ അതിന്റെ ഉള്ളില്‍ ആളുണ്ടോ എന്നായിരിക്കും. ചിത്രം പുറത്തിറങ്ങിയ സമയത്ത് പലരും തിരഞ്ഞത് കുഞ്ഞപ്പന്‍ ആരെന്നായിരുന്നു. പക്ഷെ ആ വിവരം അണിയറ പ്രവര്‍ത്തകര്‍ പുറത്ത് വിട്ടിരുന്നില്ല. ഇപ്പോഴിതാ കുഞ്ഞപ്പനുള്ളിലെ മനുഷ്യന്‍ ആരെന്ന് തുറന്നു പറഞ്ഞിരിക്കുകയാണ് ചിത്രത്തിന്റെ അണിയറ പ്രവര്‍ത്തകര്‍.

മലയാളി തിരഞ്ഞു നടന്ന കുഞ്ഞപ്പന്‍ നടന്‍ സൂരജ് തേലക്കാടാണ്. ചാര്‍ലി, അമ്പിളി തുടങ്ങിയ സിനിമകളിലൂടേയും സ്റ്റേജ് ഷോകളിലൂടേയും റിയാലിറ്റി ഷോകളിലൂടെയുമൊക്കെ മലയാളികള്‍ക്ക് ഏറെ പരിജിതനാണ് സൂരജ്. അതുകൊണ്ട് തന്നെ സൂരജ് ആയിരുന്നു കുഞ്ഞപ്പനുള്ളിലെന്ന വിവരം പുറത്തുവിടാതെ സൂക്ഷിക്കുകയായിരുന്നു അണിയറ പ്രവര്‍ത്തകര്‍. ഇപ്പോള്‍ മനോരമ ഓണ്‍ലൈനിന് നല്‍കിയ അഭിമുഖത്തിലാണ് കുഞ്ഞപ്പന്‍ ആരെന്ന് അണിയറ പ്രവര്‍ത്തകര്‍ വെളിപ്പെടുത്തിയത്.

സ്വന്തം മുഖം കാണിക്കാത്ത ഒരു ടൈറ്റില്‍ കഥാപാത്രമായിരുന്നു കുഞ്ഞപ്പനെന്ന റോബോട്ട്. ആ വേഷം വളരെ ഭംഗിയായി അവതരിപ്പിക്കുകയായിരുന്നു സൂരജ്. ചിത്രം വിജയമായതിന്‍രെ സന്തോഷത്തിലാണ് സൂരജ്. സിനിമയുടെ ആസ്വാദനത്തിന് തടസമാകേണ്ടെന്ന് കരുതിയാണ് പേര് വെളിപ്പെടുത്താതിരുന്നതെന്ന് ചിത്രത്തിന്റെ സംവിധായകന്‍ രതീഷ് പൊതുവാള്‍ പറയുന്നു. അതേസമയം, കുഞ്ഞപ്പന്റെ രണ്ടാം ഭാഗത്തെ കുറിച്ച് ചിന്തിക്കുന്നുണ്ടെന്നും അദ്ദേഹം പറഞ്ഞു.

സൂരജിന്റെ അര്‍പ്പണ ബോധത്തേയും സ്വയം സമര്‍പ്പണത്തേയും സുരാജ് വെഞ്ഞാറമൂടും സൈജു കുറുപ്പും അഭിനന്ദിച്ചു. ഏറെ നേരമെടുത്താണ് സൂരജിനെ കുഞ്ഞപ്പനാക്കി മാറ്റിയത്. 40 ദിവസത്തോളമെടുത്തായിരുന്നു കുഞ്ഞപ്പന്റെ കോസ്റ്റ്യൂം തയ്യാറാക്കിയത്. ശരീരഭാരം നിയന്ത്രിച്ചാണ് സൂരജ് കുഞ്ഞപ്പനാകാന്‍ തയ്യാറെടുത്തത്. മേയ്ക്ക് ഓവറിന്റെ വീഡിയോയും അണിയറപ്രവര്‍ത്തകര്‍ പുറത്തു വിട്ടിട്ടുണ്ട്.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close