ന്യൂഡല്‍ഹി: മലിനീകരണ വിരുദ്ധ മാനദണ്ഡങ്ങള്‍ ലംഘിക്കുന്നതിനെ കുറിച്ച് പരാതികള്‍ രജിസ്റ്റര്‍ ചെയ്യാന്‍ ഗ്രീന്‍ ഡല്‍ഹി മൊബൈല്‍ ആപ്ലിക്കേഷന്‍ മുഖ്യമന്ത്രി അരവിന്ദ് കെജ്രിവാള്‍ വ്യാഴാഴ്ച ആരംഭിക്കുമെന്ന് അറിയിച്ചു. ശീതകാലം ആരംഭിച്ചതോടെ ദേശീയ തലസ്ഥാന മേഖലയിലെ (എന്‍സിആര്‍) വായുവിന്റെ ഗുണനിലവാരം മോശമായതിനാല്‍, അന്തരീക്ഷ മലിനീകരണത്തിനെതിരെ പോരാടുന്നതിന് സര്‍ക്കാര്‍ ഏഴ് പോയിന്റ് കര്‍മപദ്ധതി പുറത്തിറക്കി, ഈ ആപ്ലിക്കേഷന്‍ സമാരംഭിക്കുന്നത് അതേ പദ്ധതിയുടെ ഭാഗമാണ്. ആപ്ലിക്കേഷനില്‍ പരാതികള്‍ക്കൊപ്പം മലിനീകരണ വിരുദ്ധ മാനദണ്ഡങ്ങളുടെ ലംഘനങ്ങളുടെ ഫോട്ടോകളും വീഡിയോകളും അപ്ലോഡ് ചെയ്യാന്‍ ഉപയോക്താക്കള്‍ക്ക് കഴിയുമെന്നതാണ് പ്രത്യേകത. പോലീസ്, പൊതുമരാമത്ത് വകുപ്പുകള്‍, ദില്ലി ഡവലപ്മെന്റ് അതോറിറ്റി, നാഷണല്‍ ഹൈവേ അതോറിറ്റി ഓഫ് ഇന്ത്യ, മൂന്ന് മുനിസിപ്പല്‍ കോര്‍പ്പറേഷനുകള്‍, ന്യൂഡല്‍ഹി മുനിസിപ്പല്‍ കൗണ്‍സില്‍, റവന്യൂ, പരിസ്ഥിതി വകുപ്പുകള്‍ എന്നിവരുമായി ദില്ലി പരിസ്ഥിതി മന്ത്രി ഗോപാല്‍ റായ് ചൊവ്വാഴ്ച അവലോകന യോഗം ചേര്‍ന്നു.
