BIZ

ഈസ്റ്റേണ്‍ കറിപൗഡറിന് ഇനി ‘നോര്‍വെ രുചി’; ഏറ്റെടുക്കല്‍ രണ്ടായിരം കോടിയ്ക്ക്

കൊച്ചി: സുഗന്ധവ്യഞ്ജന-കറിക്കൂട്ട് വിപണിയിലെ ദക്ഷിണേന്ത്യയിലെ കുത്തകകളിലൊന്നായ ഈസ്റ്റേണിനെ നോര്‍വെ കമ്പനിയായ ഓര്‍ക്ല സ്വന്തമാക്കി. ഈസ്റ്റേണ്‍ കോണ്ടിമെന്റ്സ് പ്രൈവറ്റ് ലിമിറ്റഡിന്റെ 67.8 ശതമാനം ഓഹരി ഓര്‍ക്ല വാങ്ങി. ഇതുവഴി ഓര്‍ക്ല ഇന്ത്യയിലെ വില്‍പ്പന ഇരട്ടിയാക്കും.സഹസ്ഥാപനമായ എംടിആര്‍ ഫുഡ്സ് പ്രൈവറ്റ് ലിമിറ്റഡ് മുഖേനെയാണ് രണ്ടായിരം കോടി രൂപ വില മതിക്കുന്ന ഇടപാടിലൂടെ ഈസ്റ്റേണിനെ ഓര്‍ക്ല ഏറ്റെടുക്കുന്നത്. ഇതുസംബന്ധിച്ച് എംടിആറും ഈസ്റ്റേണും കരാറില്‍ ഒപ്പിട്ടു.

ഇന്ത്യയിലെ ബ്രാന്‍ഡഡ് ഭക്ഷ്യവിപണിയില്‍ ശക്തമായ സ്വാധീനമുള്ള കമ്പനിയാണ് ഓര്‍ക്ല. പ്രശസ്ത എംടിആര്‍ ബ്രാന്‍ഡിലെ 2007 ല്‍ ഏറ്റെടുത്തതുവഴി ഇന്ത്യയിലെ വില്‍പ്പന ഓര്‍ക്ല അഞ്ചിരട്ടിയായി വര്‍ധിപ്പിച്ചിരുന്നു. ഈസ്റ്റേണിനെ ഏറ്റെടുക്കുന്നതിലൂടെ ഇന്ത്യയിലെ മുന്‍നിര ബ്രാന്‍ഡഡ് ഭക്ഷ്യവില്‍പ്പന സ്ഥാപനമായി തങ്ങള്‍ മാറുമെന്ന് ഓര്‍ക്ല അവകാശപ്പെട്ടു. ഒപ്പം സുഗന്ധവ്യഞ്ജന വിഭാഗത്തിലും ഇതിനോടനുബന്ധിച്ച വിഭാഗങ്ങളിലും കൂടുതല്‍ വളര്‍ച്ചയ്ക്കു സാധ്യതയൊരുങ്ങുമെന്നും ഓര്‍ക്ല പ്രതീക്ഷ പ്രകടിപ്പിച്ചു.

ഈസ്റ്റേണ്‍ ഓഹരിയില്‍ 74 ശതമാനവും മീരാന്‍ കുടുംബമാണ് ഇതുവരെ കൈവശം വച്ചിരുന്നത്. ശേഷിക്കുന്ന 26 ശതമാനം ഓഹരിയും മക് കോര്‍മിക് ഇന്‍ഗ്രീഡിയന്റ് എസ്ഇ ഏഷ്യ പിടിഇ ലിമിറ്റഡിന്റെ പക്കലായിരുന്നു. മീരാന്‍ കുടുംബാംഗങ്ങളുടെ പക്കല്‍നിന്ന് 41.8 ശതമാനം ഓഹരിയും മക് കോര്‍മിക്കിന്റെ മുഴുവന്‍ ഓഹരിയും ഓര്‍ക്ല വാങ്ങി. ഏറ്റെടുക്കല്‍ പൂര്‍ത്തിയാകുന്നതോടെ ഈസ്റ്റേണിന്റെ 67.8 ശതമാനം ഉടമസ്ഥാവകാശം ഓര്‍ക്ലയുടെ കൈവശമാകും.കോമ്പറ്റീഷന്‍ കമ്മിഷന്റെ അനുമതിയുടെ ലഭിക്കുന്നതോടെയാണ് ഏറ്റെടുക്കല്‍ നടപടികള്‍ പ്രാവര്‍ത്തികമാകുക.

ആദ്യ ഘട്ടത്തിനുശേഷം ഈസ്റ്റേണിനെ എംടിആറുമായി ലയിപ്പിക്കും. ഇതോടെ കമ്പനിയില്‍ ഓര്‍ക്ലയ്ക്ക് 90.1 ശതമാനവും ഫിറോസ്, നവാസ് മീരാന്‍ സഹോദരങ്ങള്‍ക്കു 9.99 ശതമാനമാവും ഉടമസ്ഥാവകാശമാവും.1983 ല്‍ എംഇ മീരാനാണ് ഈസ്റ്റേണ്‍ കോണ്ടിമെന്റ്സ് പ്രൈവറ്റ് ലിമിറ്റഡ് സ്ഥാപിച്ചത്. ഈ വര്‍ഷണ്‍ ജൂണ്‍ 30 ന് അവസാനിച്ച 12 മാസത്തെ കമ്പനിയുടെ വിറ്റുവരവ് 900 കോടി രൂപയാണ്. ഇതില്‍ പകുതിയോളം കേരളത്തില്‍നിന്നുള്ളതാണ്. ശേഷിക്കുന്ന തുക തുല്യമായി രാജ്യത്തിന്റെ മറ്റുഭാഗങ്ങളിലെ വില്‍പ്പനയിലൂടെയും കയറ്റുമതിയിലുടെയുമുള്ളതാണ്.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close