KERALANEWS

ഉദയകുമാര്‍ ഉരുട്ടിക്കൊല കേസിലെ പ്രതിയും പോലീസ് ഉദ്യോഗസ്ഥനുമായ ശ്രീകുമാര്‍ മരിച്ചു

തിരുവനന്തപുരം: ഉദയകുമാര്‍ ഉരുട്ടിക്കൊല കേസിലെ പ്രതിയും പോലീസ് ഉദ്യോഗസ്ഥനുമായ നെയ്യാറ്റിന്‍കര സ്വദേശി ശ്രീകുമാര്‍ (44) മരിച്ചു. കാന്‍സര്‍ ബാധിച്ചതിനെ തുടര്‍ന്ന് കഴിഞ്ഞ മൂന്ന് വര്‍ഷങ്ങളായി ചികിത്സയിലായിരുന്നു. ഇന്നലെ വൈകുന്നേരം തീരെ അവശനായതിനെത്തുടര്‍ന്ന് വീട്ടില്‍ നിന്നും നെയ്യാറ്റിന്‍കരയിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

കേസിലെ രണ്ടാം പ്രതിയായ ശ്രീകുമാറിന് വധശിക്ഷയും പിഴയുമാണ് 2018ല്‍ സിബിഐ പ്രത്യേക കോടതി വിധിച്ചത്. വിധി വന്ന് ജയിലിലെത്തി അഞ്ചാം നാളാണ് രോഗം തിരിച്ചറിഞ്ഞത്. തുടര്‍ന്ന് പോലീസ് കാവലില്‍ ആശുപത്രിയില്‍ ചികിത്സയിലായിരുന്നു. പിന്നീട് വീട്ടിലേക്ക് മാറ്റിയെങ്കിലും ഇന്നലെ രോഗം മൂര്‍ച്ഛിച്ചു. ഫോര്‍ട്ട് പോലീസ് സ്റ്റേഷനിലെ സീനിയര്‍ സിവില്‍ പോലീസ് ഓഫീസറായിരുന്നു ശ്രീകുമാര്‍. മോഷ്ടാവെന്ന പേരില്‍ കസ്റ്റഡിയിലെടുത്ത ഉദയകുമാര്‍ എന്ന യുവാവ് 2005 ല്‍ മരിച്ച കേസിലാണ് ശ്രീകുമാര്‍ ശിക്ഷിക്കപ്പെട്ടത്. ജിതകുമാര്‍ എന്ന മറ്റൊരു പോലീസുകാരനും വധശിക്ഷ വിധിച്ചിരുന്നു. കൊലയില്‍ നേരിട്ട് പങ്കുള്ളതായി കണ്ടെത്തിയ മറ്റൊരു പ്രതി സോമന്‍ വിചാരണക്കിടെ മരിച്ചു.

അവസാനമായി തിരുവനന്തപുരത്ത് കന്റോണ്‍മെന്റ് സ്റ്റേഷനിലാണ് ശ്രീകുമാര്‍ ജോലി നോക്കിയത്. മലപ്പുറത്ത് ഹയര്‍ സെക്കന്‍ഡറി സ്‌കൂള്‍ അധ്യാപികയായ ലക്ഷ്മിപ്രിയ ആണ് ഭാര്യ. മകള്‍ പ്ലസ് ടൂ വിദ്യാര്‍ത്ഥിനി ശ്രീപാര്‍വ്വതി. റിട്ടയേര്‍ഡ് എസ്.ഐ ശിവരാജന്‍, കെ.എസ്.ആര്‍.ടി.സി.യില്‍ നിന്ന് വിരമിച്ച വിജയകുമാരി എന്നിവരാണ് മാതാപിതാക്കള്‍.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close