KERALANEWS

ഉദുമ എംഎല്‍എയ്ക്ക് ഇത് വിളവെടുപ്പ് കാലം

കാസര്‍കോട്: രാഷ്ട്രീയത്തില്‍ കയറിയാല്‍ അതുതന്നെ തൊഴിലെന്ന് ചിന്തിക്കുന്നവര്‍ക്കിടയില്‍ വേറിട്ടൊരു വ്യക്തിത്വം സൃഷ്ടിക്കുകയാണ് ഉദുമ എംഎല്‍എ കെ കുഞ്ഞിരാമന്‍.ഈ എംഎല്‍എ യ്ക്ക് കൃഷിയും രാഷ്ട്രീയവും ഒരുപോലെയാണ്.രാഷ്ട്രീയം തൊഴിലെന്ന് ചിന്തിക്കുന്നവര്‍ക്കിടയില്‍ തൊപ്പിപ്പാളയും അരിവാളും മുറവുമൊക്കെയായി ജീവിക്കുന്ന തനി കര്‍ഷകനായ കുഞ്ഞിരാമനുണ്ട്. കൃഷിയും പൊതുപ്രവര്‍ത്തനവും ഒരുപോലെ കൊണ്ടുപോവുകയാണ് എഴുപത്തിരണ്ടാം വയസ്സിലും നാടിന്റെ സ്വന്തം എംഎല്‍എ .

ലോക്ക് ഡൗണില്‍ വിത്തെറിഞ്ഞ് നൂറുമേനികൊയ്ത സന്തോഷത്തിലാണ് എംഎല്‍എ ഇപ്പോള്‍. പിതാവ് ചന്തുമണിയാണിയുടെ കൂടെക്കൂടി വളരെ കുട്ടിക്കാലം മുതല്‍ തുടങ്ങിയതാണ് കുഞ്ഞിരാമന്റെ കൃഷിയുമായുള്ള ബന്ധം. തലമുറകള്‍ കൈമാറി കൃഷിഭൂമികള്‍ ലഭിച്ചപ്പോള്‍ കൃഷിയെ കൈവിടാന്‍ കുഞ്ഞിരാമന് ആയില്ല. തൊഴിലാളികള്‍ക്കൊപ്പം ചേറിലിറങ്ങി വിയര്‍പ്പൊഴുക്കി ചോറുണ്ണാനുള്ള അരിയുണ്ടാക്കാനാണ് എംഎല്‍എയ്ക്ക് ഇപ്പോഴും ഇഷ്ടം.

ലോക്ക് ഡൗണ്‍ സമയത്ത് വിഷുകഴിഞ്ഞ് അടുത്ത ദിവസമാണ് കന്നിമണ്ണില്‍ വിത്തെറിഞ്ഞത്. പനയാല്‍ കൃഷിഭവനില്‍നിന്ന് നല്‍കിയ നാലുപറ ഉമ, ആതിര വിത്താണ് ഇക്കുറി വിതച്ചത്. ആലക്കാട്ടെ തമ്പോത്തിങ്കല്‍ വയലിലെ രണ്ടര ഏക്കര്‍ സ്ഥലത്താണ് എംഎല്‍എയും കുടുംബവും വിത്തിറക്കിയത്. പള്ളിക്കര പഞ്ചായത്തില്‍നിന്ന് തൊഴിലുറപ്പ് തൊഴിലാളികളെത്തിയാണ് പണി പൂര്‍ത്തിയാക്കിയത്. സഹോദരങ്ങളായ കെ.ദാമോദരനും കെ.നാരായണനും കെ.കാര്‍ത്ത്യായനിയും ഭാര്യ പി.പദ്മിനിയും ഒപ്പമുണ്ടായിരുന്നു. കോഴിവളവും ചാണകവുമിട്ട് പാകപ്പെടുത്തിയ മണ്ണില്‍ മെയ് അവസാനം മഴ തുടങ്ങിയതോടെ പറിച്ചുനട്ടു. വയലിലെ കാര്യങ്ങള്‍ക്കെല്ലാം കുഞ്ഞിരാമനൊപ്പം കൃഷി ഓഫീസര്‍ കെ.വേണുഗോപാലനും എപ്പോഴും സഹായത്തിനുണ്ടായിരുന്നു.

ഒക്ടോബര്‍ ഒന്‍പതിനാണ് കൊയ്ത്ത് തുടങ്ങിയത്. മഴയെത്തും മുമ്പേ വിളകൊയ്യാന്‍ തൊപ്പിപ്പാളയും ധരിച്ച് ബന്ധുക്കളെയും തൊഴിലാളികളെയുംകൂട്ടി അരയും മുറുക്കി കൊയ്ത്തിനിറങ്ങുകയായിരുന്നു. വിളവെടുപ്പ് സമയത്തെ മഴയില്‍ അല്പം ആശങ്ക ഉണ്ടായിരുന്നു. എന്നാല്‍ കൊയ്തു കഴിഞ്ഞപ്പോള്‍ ആശങ്ക മാറി. ഇക്കുറി 200 പറ നെല്ലാണ് കിട്ടിയതെന്നും മഴ ചതിച്ചില്ലായിരുന്നെങ്കില്‍ വിളവ് ഇതിലും കൂടുമായിരുന്നെന്നും എംഎല്‍എ പറഞ്ഞു. മെതിക്കാനും ആരെയും കാത്തുനിന്നില്ല. വയലില്‍ കല്ലുവെച്ച് കറ്റതല്ലി മെതിക്കാനും കുഞ്ഞിരാമന്‍ മുന്നില്‍നിന്നു. ഭാര്യ പത്മാവതി, മകന്‍ പത്മനാഭന്‍, മരുമകള്‍ ശില്‍പ, സഹോദരി കാര്‍ത്യായനി, സഹോദരന്റെ ഭാര്യ ബേബി പ്രസന്ന, അശ്വതി, സരസ്വതി തുടങ്ങിയവരാണ് വിളകൊയ്യാനെത്തിയത്. ജനപ്രതിനിധിയെന്ന നിലയിലും മാതൃകയാക്കാവുന്ന വ്യക്തിത്വമാണ് കുഞ്ഞിരാമന്റേത്. പശുവും കോഴിയും താറാവും തുടങ്ങി ഒരു കര്‍ഷകന്റെ വീട്ടില്‍ വേണ്ടുന്ന എല്ലാം ഇദ്ദേഹത്തിന്റെ വീട്ടിലുണ്ട്.

Tags
Show More

Related Articles

Leave a Reply

Your email address will not be published.

Back to top button
Close