KERALANEWS

ഓര്‍മ്മയിലാദ്യം:പെരിക്കല്ലൂര്‍ കടവില്‍ തോണിയിറങ്ങിയിട്ട് ഏഴ് മാസം പിന്നിടുന്നു

പുല്‍പ്പള്ളി: പെരിക്കല്ലൂര്‍ കടവില്‍ തോണിയിറങ്ങിയിട്ട് ഏഴ് മാസം പിന്നിടുമ്പോള്‍ കടത്തുകാരും കുടുംബങ്ങളും കടുത്ത ദുരിതത്തിലാണ്.കര്‍ണാടകയിലെ ബൈരക്കുപ്പയെയും, കേരളത്തിലെ പെരിക്കല്ലൂരിനെയും ബന്ധിപ്പിക്കുന്ന തോണിക്കടവില്‍ കൊവിഡിനെ ഫലമായി പ്രഖ്യാപിച്ച ലോക്ക്ഡൗണിനെ തുടര്‍ന്നാണ് കടത്ത് നിലച്ചത്. പിന്നീട് ഘട്ടംഘട്ടമായി മറ്റ് സര്‍വ്വീസുകളെല്ലാം പുനരാരംഭിച്ചെങ്കിലും തോണിക്കടത്തിന്റെ കാര്യത്തില്‍ ഇതുവരെ തീരുമാനങ്ങളൊന്നുമുണ്ടായില്ല.

പെരിക്കല്ലൂരില്‍ കബനിനദികടക്കാന്‍ പ്രധാനമായും മൂന്ന് കടവുകളാണുള്ളത്. മരക്കടവ്, ഡിപ്പോ, പിന്നെ തോണിക്കടവ്. ഇതില്‍ മരക്കടവിലും ഡിപ്പോയിലുമായി പത്തും, തോണിക്കടവില്‍ മാത്രമായി 15നും തോണികളാണുള്ളത്. ഇത്രയും തോണികളിലായി 50-ഓളം ജീവനക്കാരാണുള്ളത്. ഇവരുടെ കുടുംബങ്ങളാണ് കടത്ത് നിലച്ചതോടെ പട്ടിണിയിലായത്. ബൈരക്കുപ്പയില്‍ നിന്നും പെരിക്കല്ലൂരിലേക്കും തിരിച്ചും ദിവസേന നൂറ് കണക്കിനാളുകളാണ് യാത്ര ചെയ്തുവന്നിരുന്നത്. ബൈരക്കുപ്പ നിവാസികള്‍ കൂലിപ്പണിക്കായി ആശ്രയിച്ചിരുന്നത് പുല്‍പ്പള്ളി മേഖലയെയാണ്. നൂറിലധികം വിദ്യാര്‍ത്ഥികളാണ് ദിവസം പെരിക്കല്ലൂര്‍ സ്‌കൂള്‍ അടക്കമുള്ള വിദ്യാഭ്യാസ സ്ഥാപനങ്ങളിലേക്ക് കബനി കടന്ന് എത്തിയിരുന്നത്. ഇവിടെ നിന്നും നിരവധി കുട്ടികള്‍ ജില്ലയിലെ വിവിധ കോളേജുകളിലും പഠിക്കുന്നുണ്ട്.

കര്‍ണാടകയിലെ മൈസൂര്‍, ബാംഗ്ലൂര്‍ തുടങ്ങിയ സ്ഥലങ്ങളില്‍ പഠിക്കുന്ന വിദ്യാര്‍ത്ഥികള്‍ക്ക് അവിടേക്ക് പോകാനുള്ള എളുപ്പവഴി കൂടിയാണ് ബൈരക്കുപ്പ. ഇതിന് പുറമെ ,കുടകിലും മറ്റും സ്ഥലം പാട്ടത്തിനെടുത്ത് കൃഷി ചെയ്തുവന്നിരുന്ന വയനാട്ടിലെ കര്‍ഷകര്‍ തൊഴിലാളികളെയും മറ്റുമായി പോയിരുന്നതും ഇതേ വഴി തന്നെയായിരുന്നു. എന്നാല്‍ മാസങ്ങളായി ഇതെല്ലാം നിശ്ചലമായി കിടക്കുകയാണ്. തന്റെ ഓര്‍മ്മയില്‍ ആദ്യമായിട്ടാണ് തോണിക്കടവ് ഇത്രയും കാലം അടച്ചിടുന്നതെന്ന് തോണി സര്‍വീസ് നടത്തുന്ന പെരിക്കല്ലൂരിലെ കടത്തുകാരായ സെല്‍വരാജും, വര്‍ഗീസും പറയുന്നു

ഇന്ന് വരെ ബസ് സര്‍വീസ് ആരംഭിച്ചിട്ടില്ലാത്തതിനാല്‍ ജനങ്ങളുടെ ആശ്രയം തോണി തന്നെയാണ്. കടവ് അടച്ചിട്ടിരിക്കുന്നതിനാല്‍ ഇരുസ്ഥലങ്ങളിലേക്കുമുള്ള പോക്കുവരവ് പൂര്‍ണമായി നിലച്ചിരിക്കുകയാണ്. ഈ സാഹചര്യത്തില്‍ കൊവിഡ് നിയന്ത്രണങ്ങള്‍ നിലനിര്‍ത്തികൊണ്ട് കടവ് തുറക്കാന്‍ തയ്യാറാകണമെന്നും സെല്‍വരാജ് ആവശ്യപ്പെടുന്നു. കടത്ത് നിലച്ചതോടെ കഴിഞ്ഞ മാര്‍ച്ച് മാസം മുതല്‍ പലയിടങ്ങളിലായി കെട്ടിയിട്ട തോണികളില്‍ പലതും നശിച്ചുതുടങ്ങിയതായി വര്‍ഗീസും ചൂണ്ടിക്കാട്ടുന്നു. അടിയന്തരമായി അധികൃതര്‍ വിഷയത്തില്‍ ഇടപെട്ട് തങ്ങളുടെ ജീവിതോപാധിയായ തോണിക്കടത്ത് പുനരാരംഭിക്കണമെന്നും അദ്ദേഹം കൂട്ടിച്ചേര്‍ക്കുന്നു. തോണിക്കടത്ത് അടിയന്തരമായി പുനരാരംഭിക്കണമെന്നതാണ് പ്രദേശവാസികളും മുന്നോട്ടുവെക്കുന്ന പ്രധാന ആവശ്യം.

Show More

Related Articles

Leave a Reply

Your email address will not be published.

Back to top button
Close