തൊടുപുഴ കുടയത്തൂരില്‍ സര്‍ക്കാര്‍ സംരക്ഷിത പച്ചത്തുരുത്ത് കൈയേറി ദൃശ്യം 2 സിനിമയ്ക്കായി സെറ്റ് നിര്‍മ്മിച്ചതായി പരാതി. ജില്ലാ കളക്ടര്‍ ഇടപെട്ടതോടെ ഇരുപത്തി അയ്യായിരം രൂപ കെട്ടിവെച്ച് ചിത്രീകരണം നടത്താന്‍ അനുമതി നല്‍കി. ദൃശ്യം ആദ്യ ഭാഗത്തിലെ പൊലീസ് സ്റ്റേഷന്‍ ഉള്‍പ്പടെയുള്ള ലൊക്കേഷന്റെ സെറ്റും ഇവിടെയായിരുന്നു. സര്‍ക്കാര്‍ ഭൂമിയില്‍ തൈകള്‍ നട്ട് വനമാക്കുന്ന പച്ചതുരുത്ത് പദ്ധതി പ്രദേശത്താണ് സിനിമാസംഘം സെറ്റിട്ടത്. പദ്ധതി ഉദ്ഘാടനത്തിന് ശേഷം പച്ചതുരുത്ത് എന്ന ബോര്‍ഡ് ഇവിടെ സ്ഥാപിച്ചിരുന്നെങ്കിലും അത് ശ്രദ്ധിക്കാതെയാണ് സെറ്റിട്ടത് ഇതോടെ കുടയത്തൂര്‍ പഞ്ചായത്ത് പ്രസിഡന്റിന്റെ നേതൃത്വത്തില്‍ സ്ഥലത്ത് എത്തിയ ഹരിത മിഷന്‍ പ്രവര്‍ത്തകര്‍ നിര്‍മ്മാണം തടഞ്ഞു. മുവാറ്റുപുഴ വാലി ഇറിഗേഷന്‍ പദ്ധതി പ്രദേശത്ത് നേരത്തെ തന്നെ ചിത്രീകരണ അനുമതി വാങ്ങിയിരുന്നതായി ദൃശ്യം 2 സിനിമാ സംഘം വ്യക്തമാക്കി. പച്ചതുരുത്ത് നശിപ്പിക്കാതെ ചിത്രീകരണം തുടരുമെന്നാണ് അണിയറ പ്രവര്‍ത്തകര്‍ നല്‍കിയിരിക്കുന്ന ഉറപ്പ്.
