ന്യൂഡല്‍ഹി: ഐസിഎംആറുമായി സഹകരിച്ച് ഭാരത് ബയോടെക് വികസിപ്പിച്ചു കൊണ്ടിരിക്കുന്ന ഇന്ത്യയുടെ കൊവിഡ് പ്രതിരോധ മരുന്നായ കൊവാക്സിന്റെ മനുഷ്യരിലെ പരീക്ഷണം മൂന്നാം ഘട്ടത്തിലേയ്ക്ക്. ഇതുവരെ 18 വയസ്സിന് മുകളിലുള്ള 28,500 പേരില്‍ വാക്സിന്‍ പരീക്ഷണം നടത്തി കഴിഞ്ഞതായും ഭാരത് ബയോടെക് ഡിസിജിഐയ്ക്ക് നല്‍കിയ അപേക്ഷയില്‍ വ്യക്തമാക്കിയിരുന്നു. ഇതുകൂടാതെ, പൂനെ ആസ്ഥാനമായുള്ള സെറം ഇന്‍സ്റ്റിറ്റ്യൂട്ട് ഓഫ് ഇന്ത്യയുമായി പങ്കാളിത്തത്തോടെ ആസ്ട്രാ സെനെക വികസിപ്പിക്കുന്ന ഓക്സ്ഫഡ് കൊവിഡ് വാക്സിന്‍ പരീക്ഷണം രണ്ടും മൂന്നും ഘട്ടങ്ങളിലാണുള്ളത്. സൈഡസ് കാഡില എന്ന കമ്പനി നടത്തുന്ന കൊവിഡ് വാക്സിന്‍ പരീക്ഷണം രണ്ടാം ഘട്ടത്തിലാണ്.
ഹൈദരാബാദ് ആസ്ഥാനമായി ഭാരത് ബയോടെക് ഈ മാസം രണ്ടിനാണ് ഡ്രഗ്സ് കണ്‍ട്രോളര്‍ ജനറല്‍ ഓഫ് ഇന്ത്യയ്ക്ക് (ഡിസിജിഐ) അപേക്ഷ നല്‍കിയത്. ഡല്‍ഹി, മുംബൈ, പട്ന, ലക്നൗ തുടങ്ങി രാജ്യത്തെ 19 കേന്ദ്രങ്ങളിലായാണ് വാക്സിന്റെ ക്ലിനിക്കല്‍ പരീക്ഷണം നടക്കുന്നത്.’പരീക്ഷണ വാക്സിനില്‍ രോഗപ്രതിരോധശേഷി കണ്ടെത്തിയതിനാല്‍, ആദ്യഘട്ടത്തില്‍ തന്നെ രോഗബാധ തടയാന്‍ സഹായിക്കും’ എന്നാണ് ഭാരത് ബയോടെക് വെബ്സൈറ്റില്‍ കുറിച്ചത്.
മൃഗങ്ങളില്‍ നടത്തിയ വാക്സിന്‍ പരീക്ഷണത്തില്‍ കൊറോണവൈറസിനെതിരെ ശക്തമായ രോഗപ്രതിരോധം വികസിപ്പിച്ചിടെുത്തതായി ഭാരത് ബയോടെക് കഴിഞ്ഞ മാസം റിപ്പോര്‍ട്ടില്‍ പറഞ്ഞിരുന്നു. ലോകത്താകമാനം നൂറിലധികം വാക്സിനുകളാണ് കൊവിഡിനെതിരെ വികസിപ്പിച്ചു കൊണ്ടിരിക്കുന്നത്.
