KERALA

കൊവിഡ് ചികില്‍സാ കേന്ദ്രത്തിലെ പൂവാലന്മാര്‍, താക്കീത് നല്‍കി പോലീസ്

തിരുവനന്തപുരം: കൊവിഡ് ചികിത്‌സാ കേന്ദ്രത്തില്‍ പൂവാലന്മാര്‍ എത്തിയപ്പോള്‍ താക്കീത് നല്‍കാന്‍ പോലീസുമെത്തി.പിപിഇ കിറ്റു ധരിച്ചു കൊവിഡ് കേന്ദ്രത്തില്‍ കയറി പ്രശ്നക്കാരെ കസ്റ്റഡിയിലെടുക്കുമെന്ന് പോലീസ് ഉച്ചഭാഷിണിയിലൂടെ വിളിച്ചുപറഞ്ഞതോടെയാണ് പൂവാലന്‍മാര്‍ ഒതുങ്ങിയത്. കടയ്ക്കാവൂര്‍ ചെക്കാലവിളാകം ജംക്ഷനു സമീപം ശ്രീനാരായണവിലാസം ഗവണ്‍മെന്റ് ഹയര്‍സെക്കന്‍ഡറി സ്‌കൂളില്‍ പ്രവര്‍ത്തിച്ചുവരുന്ന ഫസ്റ്റ് ലെവല്‍ ട്രീറ്റ്മെന്റ് സെന്ററില്‍ പൂവാലശല്യം കൂടിയതോടെയാണ് കടയ്ക്കാവൂര്‍ പോലീസ് ഇടപെട്ടത്. ചിറയിന്‍കീഴ് താലൂക്കിലെ പ്രധാന കൊവിഡ് ചികിത്സാകേന്ദ്രമാണ് കടയ്ക്കാവൂര്‍ എസ്എന്‍വിജിഎച്ച്എസില്‍ പ്രവര്‍ത്തിക്കുന്നത്. ഇവിടെ നൂറു രോഗികളാണ് ചികിത്സയില്‍ കഴിയുന്നത്. ചികിത്സയ്ക്കായി സ്‌കൂളില്‍ കഴിയുന്ന സ്ത്രീകളെയും ജീവനക്കാരെയും അവിടെത്തന്നെ ചികിത്സയില്‍ കഴിയുന്ന ഒരുകൂട്ടം യുവാക്കളാണ് ശല്യം ചെയ്തത്.ശല്യം വര്‍ധിച്ചുവന്നതോടെ കഴിഞ്ഞ ദിവസം സംഘത്തിനെതിരെ സ്ത്രീകള്‍ ഡ്യൂട്ടി ഡോക്ടര്‍ക്കു പരാതി നല്‍കിയിരുന്നു. തുടര്‍ന്നു പരാതി അന്വേഷിച്ചെത്തിയ വനിതാ ഡോക്ടര്‍ക്കുനേരെയും യുവാക്കള്‍ മര്യാദകെട്ടു പെരുമാറിയതോടെയാണു സംഭവം വിവാദമായി മാറിയത്. തുടര്‍ന്ന് ചാര്‍ജ് ഡോക്ടറാണ് കടയ്ക്കാവൂര്‍ പോലീസില്‍ പരാതി നല്‍കിയത്. എസ്ഐ വിനോദ് വിക്രമാദിത്യന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി ഉച്ചഭാഷിണിയിലൂടെ പൂവാലന്മാര്‍ക്ക് മുന്നറിയിപ്പു നല്‍കി. ഇതോടെ പ്രശ്നം ശാന്തമായെങ്കിലും ഇവര്‍ വീണ്ടും സംഘം ചേര്‍ന്ന് പ്രശ്നങ്ങള്‍ ഉണ്ടാക്കാന്‍ തുടങ്ങി. ഇതോടെ പോലീസ് എത്തി രണ്ടാമതും മുന്നറിയിപ്പ് നല്‍കി. ഇനിയും ശല്യം തുടര്‍ന്നാല്‍ പുറത്തിറങ്ങുമ്പോള്‍ അറസ്റ്റ് ചെയ്യുമെന്നായിരുന്നു മുന്നറിയിപ്പ്.എന്നാല്‍ പൂവാലന്‍മാര്‍ പോലീസ് പോയതോടെ വീണ്ടും കമന്റടി തുടങ്ങി. പിന്നീട് സ്ഥലത്തെത്തിയ പോലീസ് പിപിഇ കിറ്റു ധരിച്ചു കേന്ദ്രത്തില്‍ കയറി പ്രശ്നക്കാരെ കസ്റ്റഡിയിലെടുക്കാന്‍ തീരുമാനിച്ചതോടെയാണ് പൂവാലന്‍മാര്‍ പത്തിമടക്കിയത്. പ്രശ്നക്കാരായ ചിറയിന്‍കീഴ് സ്വദേശികളെക്കുറിച്ച് വ്യക്തമായ സൂചന ലഭിച്ചെന്നും ചികിത്സ പൂര്‍ത്തിയാക്കി പുറത്തിറങ്ങിയാലുടന്‍ ഇവരുടെ പേരില്‍ കേസെടുക്കുമെന്നും പോലീസ് പറഞ്ഞു.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close