INDIANEWS

കോവിഡ് രോഗികളെ പരിചരിക്കാന്‍ ഇനി റോബോട്ടും

തിരുവനന്തപുരം: കൊവിഡ് രോഗികളുടെ പരിചരണത്തില്‍ ഏറെ ബുദ്ധിമുട്ട് നമുക്കിന്ന് ഉണ്ട്. രോഗിയുമായി സമ്പര്‍ക്കം പുലര്‍ത്തുന്നത് രോഗബാധയ്ക്കു കാരണമാകും എന്നതിനാലാണത്. അതിനൊരു പരിഹാരവുമായി രംഗത്തെത്തിയിരിക്കുകയാണ് ഒരു പറ്റം മിടുക്കര്‍ കൊവിഡ് രോഗിയുടെ സമീപത്തെത്തി വിവരങ്ങള്‍ ശേഖരിച്ച് ഡോക്ടര്‍മാരിലേക്കെത്തിക്കുന്ന റോബോട്ടുമായി തിരുവനന്തപുരം ഗവ. എന്‍ജിനീയറിംഗ് കോളേജിലെ വിദ്യാര്‍ഥികള്‍. തിരക്കേറിയ സമയത്ത് റോബോട്ടിന് രോഗിയുടെ അടുത്തെത്താന്‍ ജോയ്സ്റ്റിക്ക് നിയന്ത്രണത്തിലൂടെ കഴിയും. തിരക്കില്ലാത്ത സമയങ്ങളില്‍ ഓട്ടോണമസ് നാവിഗേഷന്‍ ഉപയോഗിച്ച് സ്വയം വഴി തിരഞ്ഞെടുത്തു രോഗിയുടെ അടുത്തെത്തി റോബോട്ട് വിവരങ്ങള്‍ ആരായും.ടെലിമെഡിസിന്‍ ബട്ടണ്‍ അമര്‍ത്തുമ്പോള്‍ റോബോട്ടിലെ ടാബുമായി ഡോക്ടര്‍ക്കു ബന്ധപ്പെടാനും വീഡിയോ കോണ്‍ഫറന്‍സിലൂടെ സംസാരിക്കാനുമാകും. ഒപിയിലും ആശുപത്രി വാര്‍ഡിലും ഉപയോഗപ്പെടുത്താനാകുന്ന വിധത്തിലാണ് രൂപകല്‍പ്പന. കൈ കാണിക്കുമ്പോള്‍ത്തന്നെ സാനിറ്റൈസര്‍ കൈക്കുമ്പിളിലേക്കു വീഴുന്ന നോണ്‍ കോണ്ടാക്ട് സാനിറ്റൈസിങ് സംവിധാനവും റോബോട്ടില്‍ സജീകരിച്ചിട്ടുണ്ട്. രണ്ടു മണിക്കൂര്‍കൊണ്ട് റോബോട്ടിന്റെ കംപ്യൂട്ടര്‍ സെറ്റപ്പും മാപ്പിങ്ങും എവിടെയും നടപ്പാക്കാന്‍ സാധിക്കും. രോഗികള്‍ക്കരികിലേക്ക് 40 കിലോ വരെയുള്ള സാധനങ്ങളും ഈ റോബോട്ടിലുള്ള ട്രേയിലൂടെ എത്തിക്കാനാകും

1987-91 പൂര്‍വവിദ്യാര്‍ഥി സംഘടനയായ ലൈറ്റ് ഹൗസാണ് പ്രോജക്ട് സ്പോണ്‍സര്‍ ചെയ്തിരിക്കുന്നത്. 80,000 രൂപയോളം ചെലവിലാണ് റോബോട്ടിന്റെ നിര്‍മ്മാണം. റോബോട്ട് ഓപ്പറേറ്റിംഗ് സിസ്റ്റം ഉപയോഗിച്ച് പ്രവര്‍ത്തിക്കുന്ന റോബോട്ട് റിസര്‍ച്ച് ആന്റ് ഡെവലപ്മെന്റിന്റെ ഭാഗമായി രണ്ടു മാസം കൊണ്ടാണ് ഇതിന്റെ നിര്‍മ്മാണം പൂര്‍ത്തീകരിച്ചത്.കഴിഞ്ഞ ദിവസം തിരുവനന്തപുരം മെഡിക്കല്‍ കോളേജിന് റോബോട്ടിനെ കൈമാറി. മെഡിക്കല്‍ കോളേജ് പ്രിന്‍സിപ്പല്‍ ഡോ. സാറ വര്‍ഗീസ് ഏറ്റുവാങ്ങി. ആരോഗ്യ പ്രവര്‍ത്തകര്‍ക്കായി വിദ്യാര്‍ഥികള്‍ തയാറാക്കി നല്‍കിയ റോബോട്ട് വലിയ അധ്വാനത്തിന്റെ ഫലമാണെന്നും വിദ്യാര്‍ഥികളോട് നന്ദി അറിയിക്കുന്നതായും പ്രിന്‍സിപ്പല്‍ ഡോ സാറ വര്‍ഗീസ്, ആശുപത്രി സൂപ്രണ്ട് ഡോ എം എസ് ഷര്‍മ്മദ് എന്നിവര്‍ അറിയിച്ചു.

അധ്യാപിക ഡോ. ശ്രീജയുടെ നേതൃത്വത്തില്‍ റോബോട്ടിക്സ് വിദ്യാര്‍ഥികളായ സഞ്ജുന മറിയം മാത്യൂസ് (ടീം ലീഡര്‍), എം അജ്മല്‍, കെ ഹരികൃഷ്ണന്‍, റോജിന്‍ ഫിലിപ്പ് റെജി, അരുണ്‍ ശങ്കര്‍ എന്നിവരാണ് കൊവിഡ് കെയര്‍ റോബോട്ട് രൂപകല്‍പ്പന ചെയ്തിരിക്കുന്നത്. ഡോ. രഞ്ജിത്ത് എസ് കുമാര്‍, മെഡിക്കല്‍ കോളേജ് എആര്‍എംഒ ഡോ. ഷിജു മജീദ് എന്നിവരുടെ നിര്‍ദേശങ്ങള്‍ വിദ്യാര്‍ഥികളുടെ പരിശ്രമത്തിന് മുതല്‍ക്കൂട്ടായി.

Tags
Show More

Related Articles

Leave a Reply

Your email address will not be published.

Back to top button
Close