KERALANEWS

നെല്‍പാടങ്ങളിലെ ഡ്രോണ്‍ നീക്കത്തിനെതിരെ കര്‍ഷക കൂട്ടായ്മ

കല്‍പ്പറ്റ: വയനാട്ടിലെ നെല്‍പാടങ്ങളില്‍ ഡ്രോണ്‍ ഉപയോഗിച്ച് സൂക്ഷ്മമൂലക മിശ്രിതം തളിക്കാനുള്ള നീക്കത്തിനെതിരെ വയനാട് കര്‍ഷക കൂട്ടായ്മ രംഗത്ത്. കഴിഞ്ഞ ദിവസമാണ് കൊളവള്ളിയിലെ പാടശേഖരങ്ങളില്‍ സൂക്ഷ്മമൂലക മിശ്രിതം തളിക്കാന്‍ അമ്പലവയല്‍ കൃഷി വിജ്ഞാനകേന്ദ്രത്തിലെ ശാസ്ത്രജ്ഞര്‍ പരീഷണാടിസ്ഥാനത്തില്‍ ഡ്രോണ്‍ ഉപയോഗിച്ചത്. എന്നാല്‍ ഇത് നിയമവിരുദ്ധവും, വയനാടിന്റെ പരിസ്ഥിതിക്കും സുസ്ഥിരകൃഷിക്കും ഹാനികരവുമാണെന്ന് വയനാട് കര്‍ഷക കൂട്ടായ്മ ആരോപിക്കുന്നു. കളപറിക്കല്‍, വളപ്രയോഗം, കീട നിയന്ത്രണത്തിനായുള്ള വിഷം തളിക്കല്‍ എന്നിവയ്ക്ക് തൊഴിലാളികളുടെ ക്ഷാമം നേരിടുന്നതിന്ന് പരിഹാരമായാണ് ഡ്രോണ്‍ പരീക്ഷണമെന്നാണ് ശാസ്ത്രജ്ഞരുടെ അവകാശവാദം. എന്നാല്‍ ഇത് മുഖവിലക്കെടുക്കാനാവില്ല.

കാര്‍ഷിക മേഖലയിലെ തൊഴില്‍ക്ഷാമം വ്യാജ നിര്‍മ്മിതിയാണെന്ന് ഈ കൊവിഡ്ക്കാലത്ത് കേരളത്തില്‍ ഉടനീളവും വയനാട്ടില്‍ പ്രത്യേകിച്ചും പുനരുജ്ജീവിപ്പിക്കപ്പെട്ട കൃഷിയിടങ്ങള്‍ വ്യക്തമാക്കുന്നുണ്ടെന്നും കൂട്ടായ്മ ചൂണ്ടിക്കാട്ടുന്നു. ഡ്രോണ്‍ ഉപയോഗിച്ചാല്‍ പാടശേഖരങ്ങളെ മാത്രമല്ല, മറിച്ച് കുളങ്ങള്‍, നീര്‍ച്ചാലുകള്‍, കിണറുകള്‍, സമീപത്തെ മറ്റു കൃഷിയിടങ്ങള്‍ എന്നിവയും മലിനമാകും. സമീപവാസികളായ മനുഷ്യര്‍, വളര്‍ത്തുമൃഗങ്ങള്‍, ജലജീവികള്‍ എന്നിവയ്ക്ക് വിഷബാധ ഏല്‍ക്കാനും വിഷമുക്തമായ ജൈവകൃഷിക്കു വേണ്ടിയുള്ള കര്‍ഷകരുടെ ശ്രമങ്ങളെ തുരങ്കം വെക്കാനും ഇതിടയാക്കും. മാത്രമല്ല, കൃഷിയിടങ്ങളില്‍ ഡ്രോണുകള്‍ ഉപയോഗിക്കാന്‍ കേന്ദ്ര ആഭ്യന്തര വകുപ്പ്, വ്യോമയാന മന്ത്രാലയം, കേന്ദ്ര കീടനാശിനി ബോര്‍ഡ് എന്നിവയുടെ മുന്‍കൂര്‍ അനുമതി വേണമെന്ന് കീടനാശിനി ബോര്‍ഡ് കര്‍ക്കശമായി നിഷ്‌കര്‍ഷിക്കുന്നുണ്ട്. ഇത്തരം പരീക്ഷണങ്ങള്‍ക്ക് ഇന്ത്യയില്‍ എവിടെയും ഇതുവരെ അനുമതി നല്‍കിയിട്ടുമില്ല.

ഇന്ത്യന്‍ കീടനാശിനി നിയമപ്രകാരം രാസകീടനാശിനികള്‍, കളനാശിനികള്‍, സസ്യ വളര്‍ച്ചാ സഹായികള്‍ എന്നിവയെല്ലാം കീടനാശിനികളുടെ നിര്‍വചനത്തില്‍പെടുന്നതാണ്. ഈ വിവരങ്ങള്‍ അറിയാത്തവരല്ല നമ്മുടെ കൃഷിശാസ്ത്രകാരന്മാരും വിദഗ്ദരും. കൊളവള്ളിയിലെ പരീക്ഷണത്തിന്ന് ആരാണ് ഇവര്‍ക്ക് അനുമതി നല്‍കിയതെന്ന് അത് നടത്തിയവര്‍ വ്യക്തമാക്കണമെന്നും സി എ ഗോപാലകൃഷ്ണന്റെ അധ്യക്ഷതയില്‍ ചേര്‍ന്ന കര്‍ഷക കൂട്ടായ്മയുടെ യോഗത്തില്‍ ആവശ്യപ്പെടുന്നു. കാസര്‍ക്കോട്ടെ എന്‍ഡോസള്‍ഫാന്‍ ദുരന്തവും രാസവളങ്ങളും കള-കീടനാശിനികളും അനിയന്ത്രിതമായി ഉപയോഗിച്ചതിന്റെ തിക്തഫലങ്ങളും നമ്മുടെ കണ്‍മുന്‍മ്പിലിരിക്കെ ഇത്തരം ഒരു പരീക്ഷണത്തിന്ന് കൃഷിവിജ്ഞാന കേന്ദ്രം ശാന്ത്രജ്ഞര്‍ മുന്നിട്ടിറങ്ങിയത് അപലപനീയമാണെന്നും, വയനാടിന്റെ കാര്‍ഷിക മേഖലയെ മറ്റൊരു ദുരന്തഭൂമിയാക്കി മാറ്റുന്ന തലതിരിഞ്ഞ ഇത്തരം പരീക്ഷണത്തില്‍ നിന്നും പിന്‍തിരിയണമെന്ന് കൃഷി വിജ്ഞാന കേന്ദ്രത്തിലെ ശാസ്ത്രജ്ഞരോടും കൃഷി വകുപ്പിനോടും വയനാട് കര്‍ഷകക്കൂട്ടായ്മ ആവശ്യപ്പെടുന്നു.

Show More

Related Articles

Leave a Reply

Your email address will not be published. Required fields are marked *

Back to top button
Close