KERALANEWS

മികവിന്റെ അടയാളപ്പെടുത്തല്‍ ,90 സ്‌കൂള്‍ കെട്ടിടങ്ങള്‍ ഉദ്ഘാടനം ചെയ്ത് മുഖ്യമന്ത്രി

തിരുവനന്തപുരം: കേരള സര്‍ക്കാരിന്റെ ‘100 ദിനങ്ങള്‍ 100 പദ്ധതി’കളുടെ ഭാഗമായി പൊതുവിദ്യാഭ്യാസ രംഗത്ത് മികവിന്റെ അടയാളപ്പെടുത്തല്‍. 90 സ്‌കൂള്‍ കെട്ടിടങ്ങളുടെയും 54 സ്‌കൂളുകളിലെ പുതിയ കെട്ടിടങ്ങളുടെ നിര്‍മ്മാണോദ്ഘാടനവും ഇന്ന് മുഖ്യമന്ത്രി നിര്‍വഹിച്ചു. വീഡിയോ കോണ്‍ഫറന്‍സിങ് വഴി മുഖ്യമന്ത്രി പിണറായി വിജയനാണ് സ്‌കൂള്‍ കെട്ടിടങ്ങളുടെ ഔദ്യോഗിക ഉദ്ഘാടനം നിര്‍വ്വഹിച്ചത്.

പൊതുവിദ്യാഭ്യാസ മേഖലയ്ക്ക് ചരിത്രദിനമാണിന്നെന്ന് മുഖ്യമന്ത്രി പറഞ്ഞു. കിഫ്ബിയുടെ 5 കോടി ധനസഹായത്തോടെ മികവിന്റെ കേന്ദ്രങ്ങളായ നാല് സ്‌കൂളുകളും 3 കോടി ധനസഹായത്തോടെ മികവിന്റെ കേന്ദ്രമായി വളര്‍ന്ന 20 സ്‌കൂളുകളുമാണ് നാടിന് ഇന്ന് സമര്‍പ്പിച്ചതെന്ന് മുഖ്യമന്ത്രി കൂട്ടിച്ചേര്‍ത്തു. പ്ലാന്‍ ഫണ്ടിന്റെ ഭാഗമായി നിര്‍മ്മിച്ച 62 ഉം നബാര്‍ഡ് സഹായത്തോടെ നിര്‍മ്മിച്ച നാലും സ്‌കൂള്‍ കെട്ടിടങ്ങളും ഉദ്ഘാടനം ചെയ്തു. 100 ദിന കര്‍മ്മ പരിപാടിയില്‍ ഉള്‍പ്പെടുത്തിയാണ് ഉദ്ഘാടന പരിപാടി. നേരത്തെ 34 കേന്ദ്രങ്ങള്‍ ഉദ്ഘാടനം ചെയ്തിരുന്നു.’പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്നോളജി ഫോര്‍ എഡ്യൂക്കേഷന്‍ (കൈറ്റ്) കിഫ്ബി ധനസഹായത്തോടെ നടപ്പാക്കുന്ന പദ്ധതിയില്‍ 100 സ്‌കൂളുകള്‍ നിര്‍മാണം പൂര്‍ത്തിയാക്കി എന്ന പ്രത്യേകതയും ഉണ്ട്. 5 കോടി രൂപ വീതം ചെലവഴിച്ച് 141 സ്‌കൂളുകളെ മികവിന്റെ കേന്ദ്രമാക്കുന്ന പദ്ധതിയില്‍ 67 സ്‌കൂളുകളും 3 കോടി രൂപ ചെലവഴിച്ച് നടപ്പാക്കുന്ന പദ്ധതിയില്‍ 33 സ്‌കൂളുകളും പൂര്‍ത്തിയായതായി’ മുഖ്യമന്ത്രി പറഞ്ഞു.ഈ 100 സ്‌കൂളുകളിലായി മൊത്തം 19.42 ലക്ഷം ചതുരശ്ര വിസ്തൃതിയില്‍ 1617 ക്ലാസ്/സ്മാര്‍ട്ട് റൂമുകളും 248 ലാബുകളും 62 ഹാളുകളും തിയേറ്ററുകളും 82 അടുക്കള-ഡൈനിംഗ് ഹാളുകളും 2573 ശൗചാലയങ്ങളും സജ്ജമാക്കിയിട്ടുണ്ട്. കിഫ്ബി ഫണ്ടിനൊപ്പം ജനപ്രതിനിധികളുടെ ഫണ്ടും തദ്ദേശസ്ഥാപനങ്ങളുടെ ഫണ്ടും ജനങ്ങള്‍ സമാഹരിച്ച ഫണ്ടും ഉപയോഗിച്ചാണ് നിര്‍മ്മാണം നടത്തിയത്.

‘നമ്മുടെ കുട്ടികള്‍ക്ക് മികച്ച പഠനാന്തരീക്ഷം ഉണ്ടാക്കുക, അവരുടെ വളര്‍ച്ചയ്ക്ക് സഹായകരമാകുന്ന സാഹചര്യങ്ങള്‍ ഒരുക്കുക, മികവിന്റെ കേന്ദ്രങ്ങളിലൂടെ സര്‍ക്കാര്‍ ലക്ഷ്യമിടുന്നത് ഇതാണ്. പൊതുവിദ്യാഭ്യാസ സംരക്ഷണയജ്ഞത്തെ നെഞ്ചേറ്റിയ ജനങ്ങളുടെ പിന്തുണയാണ് സര്‍ക്കാരിന്റെ കരുത്തെന്ന്’, മുഖ്യമന്ത്രി കൂട്ടിച്ചേര്‍ത്തു.

Tags
Show More

Related Articles

Leave a Reply

Your email address will not be published.

Back to top button
Close