INDIANEWS

ഫ്രാന്‍സിന് പിന്തുണ പ്രഖ്യാപിച്ച് ഇന്ത്യ

ന്യൂഡല്‍ഹി: പാരീസിലെ അധ്യാപകന്റെ കൊലപാതകത്തിന് ശേഷം പാകിസ്ഥാനും തുര്‍ക്കിയും ഫ്രാന്‍സിന് എതിരെ തിരിഞ്ഞതിന് പിന്നാലെ ഫ്രാന്‍സിന് പിന്തുണ പ്രഖ്യാപിച്ച് ഇന്ത്യ. ഇസ്ലാമിക പ്രവാചകന്‍ മുഹമ്മദിന്റെ കാര്‍ട്ടൂണ്‍ പ്രദര്‍ശിപ്പിച്ച അധ്യാപകന്റെ തലവെട്ടിയതിന് ശേഷം ഇസ്ലാമിക ഭീകരവാദത്തിന് എതിരെ കടുത്ത നടപടികള്‍ ഫ്രാന്‍സ് സ്വീകരിച്ചിരുന്നു.സാമുവല്‍ പാറ്റിയെന്ന അധ്യാപകന്റെ കൊലപാതകത്തിന് ശേഷം ഫ്രഞ്ച് സര്‍ക്കാര്‍ ഇസ്ലാമിക ഭീകരവാദികള്‍ക്ക് വേണ്ടി തെരച്ചില്‍ നടത്തി. ഒരു മുസ്ലീം പള്ളി അടപ്പിച്ചു. ഷാര്‍ലി എബ്ദോ കാര്‍ട്ടൂണുകള്‍ പൊതുസ്ഥലങ്ങളില്‍ പ്രദര്‍ശിപ്പിച്ചു. പിന്നാലെ രാജ്യത്തെ ഏറ്റവും വലിയ സിവിലിയന്‍ ബഹുമതി, അധ്യാപകന് മരണാനന്തരം സമര്‍പ്പിച്ചു.ഇതിന് പിന്നാലെയാണ് മുസ്ലീം വിരുദ്ധത ആരോപിച്ച് വിവിധ മുസ്ലീം രാഷ്ട്രങ്ങള്‍ ഫ്രാന്‍സിന് എതിരെ തിരിഞ്ഞത്. തുര്‍ക്കിയാണ് പ്രധാനമായും വാക്‌പോര് തുടങ്ങിയത്. പിന്നാലെ പാകിസ്ഥാനും പ്രതിഷേധിച്ചു. കഴിഞ്ഞ ദിവസം ബംഗ്ലാദേശില്‍ ആയിരങ്ങള്‍ അണിനിരന്ന ഫ്രഞ്ച് വിരുദ്ധ റാലിയും നടന്നിരുന്നു.

ഫ്രാന്‍സ് ഇസ്ലാം വിരുദ്ധത പ്രോത്സാഹിപ്പിക്കുകയാണെന്ന് ആരോപിച്ച് മുസ്ലീം രാഷ്ട്രങ്ങള്‍ ഫ്രാന്‍സില്‍ നിന്നുള്ള ഉല്‍പ്പന്നങ്ങള്‍ നിരോധിക്കാന്‍ സമ്മര്‍ദ്ദം ചെലുത്തി. ഫ്രഞ്ച് പ്രസിഡന്റ് എമ്മാനുവല്‍ മാക്രോണിന്റെ മനോനില പരിശോധിക്കണമെന്ന് തുര്‍ക്കി പ്രസിഡന്റ്, റെസപ് തയേപ് എര്‍ദോവാന്‍ വിവാദ പ്രസതാവന നടത്തിയിരുന്നു.ഇതിനിടയ്ക്കാണ് ഫ്രാന്‍സിന് പിന്തുണയറിയിച്ച് ഇന്ത്യ രംഗത്ത് എത്തിയത്.
അന്താരാഷ്ട്രതലത്തില്‍ പുലര്‍ത്തേണ്ട സാമാന്യമര്യാദ പോലും കാണിക്കാതെ മാക്രോണിന് എതിരെ വ്യക്തിഹത്യ നടത്തുകയാണെന്ന് ഇന്ത്യ പ്രസ്താവനയില്‍ അറിയിച്ചു. ലോകത്തെ ഞെട്ടിച്ച കൊലപാതകമാണ് ഫ്രാന്‍സില്‍ നടന്നത്. അധ്യാപകന്റെ കുടുംബത്തിനും ഫ്രഞ്ച് ജനതയ്ക്കും ഇന്ത്യ, അനുശോചനം അറിയിക്കുന്നു. ഒരു സാഹചര്യത്തിലും ഭീകരവാദം ഇന്ത്യ പ്രോത്സാഹിപ്പിക്കില്ല – വിദേശകാര്യ മന്ത്രാലയം പുറത്തിറക്കിയ പ്രസ്താവന പറയുന്നു.

ഒക്ടോബര്‍ 16ന് ആണ് പാരീസില്‍ വച്ച് ഫ്രഞ്ച് സ്‌കൂള്‍ അധ്യാപകന്റെ കഴുത്തറുത്ത സംഭവം ഉണ്ടായത്. അഭിപ്രായ സ്വാതന്ത്ര്യം പഠിപ്പിക്കുന്ന ക്ലാസ്സില്‍ വിവാദ ഹാസ്യമാസിക ഷാര്‍ലി എബ്‌ദോയുടെ 2015ലെ കാര്‍ട്ടൂണുകള്‍ അധ്യാപകന്‍ പഠിപ്പിച്ചു. ഇതില്‍ ഇസ്ലാമിക പ്രവാചകന്‍ മുഹമ്മദിന്റെ കാര്‍ട്ടൂണുകളും ഉണ്ടായിരുന്നു.തീവ്രഇടതുപക്ഷ മാസികയായ ഷാര്‍ലി എബ്‌ദോ, 2015ല്‍ ഭീകരാക്രമണത്തിന് ഇരയായിരുന്നു. പ്രവാചകന്‍ മുഹമ്മദിന്റെ കാര്‍ട്ടൂണുകള്‍ വരച്ചതിന്റെ പേരില്‍ ഭീകരവാദികള്‍ നടത്തിയ ആക്രമണത്തില്‍ 12 മാധ്യമപ്രവര്‍ത്തകരാണ് കൊല്ലപ്പെട്ടത്. ആക്രമണത്തിന് പിന്നാലെ മാസിക കൂടുതല്‍ ശക്തമായി തിരികെ വന്നു. മുഹമ്മദിന്റെ മറ്റൊരു കാര്‍ട്ടൂണും മാസിക വരച്ചു.

Tags
Show More

Related Articles

Leave a Reply

Your email address will not be published.

Back to top button
Close