തിരുവനന്തപുരം : ലേബർ കമ്മീഷണറുടെ ഉത്തരവിൻ പ്രകാരം അഡീഷണൽ ലേബർ കമ്മീഷണർ (എൻഫോഴ്സ്മെന്റ്)-ന്റെ നിയന്ത്രണത്തിൽ 13/10/2020-ന് സംസ്ഥാന വ്യാപകമായി മുത്തൂറ്റ് ഫിനാൻസ് സ്ഥാപനങ്ങളിലും അനുബന്ധ സ്ഥാപനങ്ങളിലും പരിശോധന നടത്തി. റീജീയണൽ ജോയിന്റ് ലേബർ കമ്മീഷണർ, ജില്ലാ ലേബർ ഓഫീസർ എന്നിവരുടെ നേതൃത്വത്തിൽ ആയിരുന്നു സ്ക്വാഡ് പരിശോധന .
പരിശോധനയിൽ സംസ്ഥാനത്താകമാനമുള്ള 354 സ്ഥാപനങ്ങളിലെ 1358 ജീവനക്കാരെ നേരിൽ കണ്ട് നടത്തിയ അന്വേഷണത്തിൽ 463 പേർക്ക് മിനിമം വേതനം ലഭിക്കുന്നില്ലെന്ന് കണ്ടെത്തിയിട്ടുണ്ട്. മെറ്റേണിറ്റി ബെനഫിറ്റ് നിയമം, നാഷണൽ & ഫെസ്റ്റിവെൽ ഹോളിഡെയ്സ് നിയമം എന്നിവ പ്രകാരമുള്ള നിയമ നിഷേധവും കേരള ഷോപ്സ് & കൊമേഴ്സ്യൽ എസ്റ്റാബ്ലിഷ്മെന്റ് നിയമം, മിനിമം വേതന നിയമം, മോട്ടോർ ട്രാൻസ്പോർട്ട് വർക്കേഴ്സ് നിയമം എന്നിവയുടെ ലംഘനങ്ങളൊടൊപ്പം വേതന സുരക്ഷാ പദ്ധതിയിൽ അംഗമായിട്ടില്ലാത്ത സ്ഥാപനങ്ങളെയും കണ്ടെത്തിയിട്ടുണ്ട്.
പരിശോധനയിൽ കണ്ടെത്തിയിട്ടുള്ള നിയമ ലംഘനങ്ങൾ പരിഹരിക്കുന്നതിനായി കർശ്ശന നിർദ്ദേശം നൽകിയിട്ടുണ്ടു. നിയമാനുസൃതമായ തുടർനടപടികൾ സ്വീകരിക്കും
