KERALANEWS

വയനാടന്‍ തുരങ്കപാത യാഥാര്‍ഥ്യമാകാന്‍ കടമ്പകളേറെ

കല്‍പ്പറ്റ: പിണറായി വിജയന്‍ സര്‍ക്കാര്‍ നൂറുദിന കര്‍മ്മപദ്ധതിയില്‍ ഉള്‍പ്പെടുത്തി ലോഞ്ചിംഗ് നടത്തിയ ആനക്കാംപൊയില്‍-കള്ളാടി-മേപ്പാടി തുരങ്കപാത പ്രാവര്‍ത്തികമാകാന്‍ കടമ്പകളേറെ. ലോഞ്ചിംഗിന് പിന്നാലെ പദ്ധതിക്കെതിരെ വിവിധ കോണുകളില്‍ നിന്നും പ്രതിഷേധസ്വരവും ഉയര്‍ന്നുകഴിഞ്ഞു.

പദ്ധതിക്കെതിരെ ചിന്തിക്കാന്‍ ആളുകളെ പ്രേരിപ്പിക്കുന്ന പ്രധാനഘടകം പരിസ്ഥിതിയുമായി ബന്ധപ്പെട്ട് കിടക്കുന്നു. വയനാടിന്റെ നിലവിലെ സാഹചര്യം പരിശോധിച്ചാല്‍ പരിസ്ഥിതിക്ക് കോട്ടം തട്ടുന്നതാണ് ഈ പദ്ധതിയെന്നാണ് പ്രധാനമായും ആരോപണമുയരുന്നത്. പേവ്ഡ് ഷോള്‍ഡറോട് കൂടി രണ്ടു വരിയില്‍ മുറിപ്പുഴയില്‍ നിന്നുമാരംഭിച്ച് കള്ളാടിയില്‍ അവസാനിക്കുന്ന തരത്തിലാണ് 7.826 കിലോമീറ്റര്‍ നീളത്തിലുള്ള തുരങ്കപാതയുടെ നിര്‍മ്മാണമെന്നാണ് പറയുന്നത്. ഇത് പ്രകാരം ടണലിന്റെ നീളം 6.910 കിലോമീറ്ററായിരിക്കുമെന്നും പറയുന്നു. പദ്ധതി സംബന്ധിച്ചുള്ള വിശദാംശങ്ങളില്‍ ഇങ്ങനെ പറയുമ്പോള്‍ പോലും പദ്ധതിയുമായി ബന്ധപ്പെട്ട് വിശദമായ പദ്ധതിരേഖ ഇനിയുമായിട്ടില്ലെന്നതാണ് വസ്തുത. പരിസ്ഥിതി ആഘാത സാധ്യതയുള്ള പ്രദേശമായതിനാല്‍ മലതുരന്ന് റോഡുണ്ടാക്കുമ്പോഴുണ്ടാകുന്ന പ്രത്യാഘാതങ്ങള്‍ പഠിച്ച് തയാറാക്കിയ ഡിപിആറിന് ഏറെ പ്രാധാന്യമുണ്ട്.

കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി തേടിയിട്ടുണ്ടോയെന്ന കാര്യത്തിലും യാതൊരുവിധ വ്യക്തതയും ഇനിയുമുണ്ടായിട്ടില്ല. ഇത്രയും വലിയൊരു പദ്ധതിക്ക് പരിസ്ഥിതി ആഘാത പഠനം നടത്തേണ്ടതുമുണ്ട്. എന്നാല്‍ ഇതും നടന്നിട്ടില്ലെന്ന് പറയുന്നു. അതായത് പദ്ധതിയുടെ ലോഞ്ചിംഗ് നടത്തുന്നതിന് മുന്‍പ് തന്നെ ചെയ്തുതീര്‍ക്കേണ്ടിയിരുന്ന കാര്യങ്ങളൊന്നും ഈ പാതയെ സംബന്ധിച്ച് നടന്നിട്ടില്ലെന്നതാണ് പ്രധാനമായും ഉയരുന്ന ആക്ഷേപം.

ചിപ്പിലിത്തോട്-മരുതിലാവ്-തളിപ്പുഴ റോഡും, പടിഞ്ഞാറത്തറ-പൂഴിത്തോട് ചുരം ബദല്‍ റോഡും വനം പരിസ്ഥിതി മന്ത്രാലയത്തിന്റെ എതിര്‍പ്പുമൂലം നിശ്ചലമായ പദ്ധതികളാണ്. അതിലും പാരിസ്ഥിതികാഘാതമുണ്ടാക്കുന്ന തുരങ്കപാതക്ക് എങ്ങനെയനുമതി കിട്ടുമെന്ന ചോദ്യമാണ് ബാക്കിയാവുന്നത്. റോഡില്‍ തുരങ്കപാതയുണ്ടാക്കാന്‍ പോകുന്ന കള്ളാടി മേഖലയാണെങ്കില്‍ വന്‍ ഉരുള്‍പൊട്ടലുണ്ടായ പുത്തുമലയുടെ സമീപപ്രദേശമാണ്. പ്രദേശത്ത് ഇപ്പോഴും മഴക്കാലമായാല്‍ മലയിടിച്ചില്‍ ഭീഷണിയും നിലനില്‍ക്കുന്നുണ്ട്.

Tags
Show More

Related Articles

Leave a Reply

Your email address will not be published.

Back to top button
Close