KERALANEWS

വി.കെ ഇബ്രാഹിം കുഞ്ഞിന്റെ ആരോഗ്യ നില പരിശോധിക്കാന്‍ ഉത്തരവിട്ട് കോടതി

കൊച്ചി:പാലാരിവട്ടം അഴിമതി കേസില്‍ അറസ്റ്റിലായ മുന്‍ മന്ത്രി വി.കെ ഇബ്രാഹിം കുഞ്ഞിന്റെ ആരോഗ്യ നില പരിശോധിക്കാന്‍ കോടതി ഉത്തരവിട്ടു. കോടതി നിര്‍ദ്ദേശ പ്രകാരം രൂപീകരിച്ച ആറംഗ സമിതിയാണ് പരിശോധന നടത്തുക. കസ്റ്റഡി അപേക്ഷ പരിഗണിക്കുന്നതിന് മുന്‍പ് ആരോഗ്യ നിലപരിശോധിക്കാനാണ് കോടതി നിര്‍ദ്ദേശിച്ചിരിക്കുന്നത്. അതേസമയം പ്രതി പട്ടികയിലുള്ള കൂടുതല്‍ പേരെ ഉടന്‍ ചോദ്യം ചെയ്യും.

നിലവില്‍ മരടിലെ സ്വകാര്യ ആശുപത്രിയിലെ ഓഗോളജി വിഭാഗത്തില്‍ ചികിത്സയിലാണ് ഇബ്രാഹിംകുഞ്ഞ്. അറസ്റ്റ് രേഖപ്പെടത്തി റിമാന്‍ഡ് ചെയ്‌തെങ്കിലും ആശുപത്രിയില്‍ ചികിത്സ തുടരാന്‍ കോടതി അനുവദിക്കുകയായിരുന്നു. എന്നാല്‍ വിജിലന്‍സ് നാല് ദിവസത്തെ കസ്റ്റഡി ആവശ്യം ഉന്നയിച്ച സാഹചര്യത്തിലാണ് ഇബ്രാഹീം കുഞ്ഞിന്റെ ആരോഗ്യ നില പരിശോധിക്കാന്‍ മെഡിക്കല്‍ സംഘത്തെ കോടതി നിയോഗിച്ചത്. എറണാകുളം ജില്ലാ ആശുപത്രി സൂപ്രണ്ടിന്റെ നേതൃത്വത്തില്‍ ആറംഗ സംഘമാണ് പരിശോധനകള്‍ നടത്തുക.

നിലവിലെ രോഗവസ്ഥയും ചികിത്സയും ആരോഗ്യ സ്ഥിതിയും സംബന്ധിച്ച് വിശദമായ റിപ്പോര്‍ട്ടാണ് കോടതി ആവശ്യപ്പെട്ടിട്ടുള്ളത്. സ്വകാര്യ ആശുപത്രിയിലെ ചികിത്സാ രേഖകളും പരിശോധിക്കും. ചൊവ്വാഴ്ച രാവിലെ പതിനൊന്നു മണിക്ക് മുന്‍പായി റിപ്പോര്‍ട്ട് കോടതിക്ക് കൈമാറാണമെന്നാണ് നിര്‍ദ്ദേശം.

അന്ന് തന്നെയാണ് ഇബ്രാഹിം കുഞ്ഞിന്റെ ജാമ്യപേക്ഷയും വിജിലന്‍സ് നല്‍കിയ കസ്റ്റഡി അപേക്ഷയും പരിഗണിക്കുന്നത്. ഇവ രണ്ടും കോടതി പരിഗണിക്കുന്നത് മെഡിക്കല്‍ റിപ്പോര്‍ട്ടിനെ അടിസ്ഥാനമാക്കിയായിരിക്കും. അതേസമയം പ്രതി പട്ടികയിലുള്ള കൂടുതല്‍ പേരെ ചോദ്യം ചെയ്യാനുള്ള തയ്യാറെടുപ്പുകള്‍ വിജിലന്‍സ് നടത്തിക്കഴിഞ്ഞു. ഇവരുടെ നീക്കങ്ങളും നിരീക്ഷിച്ചു വരികയാണ്.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close