KERALANEWS

സാധ്യതകളേറേ ,വിഴിഞ്ഞം തുറമുഖം അന്താരാഷ്ട്ര ഹബ്ബ് ആയി മാറുന്നു

തിരുവനന്തപുരം: വിഴിഞ്ഞം തുറമുഖം അന്താരാഷ്ട്ര ക്രൂ ചെയ്ഞ്ച് ആന്‍ഡ് ആങ്കറിങ് ഹബ്ബ് ആയി മാറുന്നു. ഇതോടെ ആയിരക്കണക്കിന് പുതിയ തൊഴിലവസരങ്ങളും നമ്മുടെ നാട്ടിലെത്തും. കഴിഞ്ഞ ജൂലായ് 15ന് ഈജിപ്തില്‍ നിന്നെത്തിയ എവര്‍ഗ്ലോബ് (എവര്‍ഗ്രീന്‍) എന്ന കണ്ടെയ്നറാണ് ആദ്യമായി വിഴിഞ്ഞത്ത് ക്രൂചെയിഞ്ചിനെത്തിയത്. തുടര്‍ന്ന് കഴിഞ്ഞ രണ്ടര മാസത്തിനിടെ ലോകത്തിലെ പ്രമുഖ കപ്പലുകളുള്‍പ്പെടെ 50 കപ്പലുകളാണ് വിഴിഞ്ഞം തുറമുഖം വഴി തങ്ങളുടെ ജീവനക്കാരെ മാറ്റിയെടുത്തത്. ഇന്നലെ നേവ് ബ്യൂണെ സ്റ്റ്യൂര്‍ട്ടെ എന്ന കപ്പലാണ് അമ്പതാമതായി വിഴിഞ്ഞത്ത് ക്രൂ ചേഞ്ചിംഗിനായി എത്തിയത്. സിംഗപ്പൂരില്‍ നിന്ന് കുവൈറ്റിലേക്കുള്ള യാത്ര മധ്യേ രാവിലെ എട്ടരയോടെയാണ് ഹോങ്കോംഗ് രജിസ്ട്രേഷനുള്ള സ്റ്റിയൂര്‍ട്ടെ വിഴിഞ്ഞം തീരത്ത് നങ്കൂരമിട്ടത്. 50 കപ്പലുകള്‍ വിഴിഞ്ഞത്തെത്തിയപ്പോള്‍ 50 ലക്ഷത്തിലധികം രൂപയാണ് ഇതുവഴി സംസ്ഥാന സര്‍ക്കാരിന് ലഭിച്ചത്. കൂടാതെ ഇതുമായി ബന്ധപ്പെട്ട് കോടിക്കണക്കിന് രൂപയുടെ അനുബന്ധ കരാറുകളും തിരുവനന്തപുരത്തെത്തി. കൊവിഡ്പ്രതിസന്ധിക്കിടെ പുതിയ അവസരങ്ങളുടെ വലിയ സാധ്യതയാണ് വിഴിഞ്ഞത്ത് ക്രൂ ചേയ്ഞ്ച് നമ്മുടെ നാട്ടിലെത്തിച്ചിരിക്കുന്നത്.

വിഴിഞ്ഞം തീരം ക്രൂ ചെയ്ഞ്ചിന്റെ അന്താരാഷ്ട്ര ഹബ്ബ് ആയി മാറുകയാണെന്നും, കൂടുതല്‍ വലിയ ഏജന്‍സികള്‍ ഇവിടേക്കു കരാറുമായി എത്താന്‍ സാധ്യതയുണ്ടെന്നും വിദഗ്ധര്‍ പറയുന്നു. ക്രൂ ചെയ്ഞ്ചിങ് നടക്കുമ്പോള്‍ ഇന്ത്യാക്കാരും വിദേശീയരുമായ നാവികര്‍ ഇവിടെയെത്തുകയും താമസിക്കുകയും ചെയ്യും. വിനോദസഞ്ചാര സാധ്യതകള്‍ പ്രയോജനപ്പെടുത്താനും നമുക്കാകും. അദാനി ഗ്രൂപ്പിന്റെ വിഴിഞ്ഞം അന്താരാഷ്ട്ര തുറമുഖം യാഥാര്‍ഥ്യമാകുന്നതോടെ ബര്‍ത്തില്‍ തന്നെയെത്തി ക്രൂ ചെയ്ഞ്ച് ഉള്‍പ്പെടെ നടത്താന്‍ ആകുമെന്നതും വിഴിഞ്ഞത്തിന്റെ സാധ്യതയെ വര്‍ദ്ധിപ്പിക്കുന്നതായി അവര്‍ അഭിപ്രായപ്പെട്ടു. ഇതുവരെ കൊളംബോ തുറമുഖം കൈകാര്യം ചെയ്തിരുന്ന നല്ലൊരുഭാഗം ഇന്ത്യന്‍ ട്രാന്‍സ്ഷിപ്പ്മെന്റ് കാര്‍ഗോ വിഴിഞ്ഞത്തെത്തും. ഇന്ത്യയിലെ കയറ്റുമതിക്കാര്‍ക്കും ഇറക്കുമതിക്കാര്‍ക്കും നല്ല അവസരമാണിത്. ദുബായ്, കൊളംബോ, സലാല, സിംഗപ്പൂര്‍ തുടങ്ങിയ തുറമുഖങ്ങള്‍ക്ക് പകരം വിഴിഞ്ഞം വഴി ട്രാന്‍സ്ഷിപ്മെന്റ് നടത്തുമ്പോള്‍ 1500 കോടിയോളം രൂപ വിദേശനാണ്യം ലഭിക്കും.

വിഴിഞ്ഞം പ്രകൃതിദത്ത തുറമുഖമായതിനാലാണ് പുരാതനകാലം മുതല്‍ യവനരും റോമാക്കാരും അറബികളും വിഴിഞ്ഞത്ത് കപ്പലടിപ്പിച്ചിരുന്നത്. നാവികസേനയുടെ ആധിപത്യത്തിലൂടെ രാജവംശങ്ങള്‍ നിലനിന്നിരുന്ന കാലത്ത് വിഴിഞ്ഞം തുറമുഖത്തിനും തന്ത്രപ്രധാനമായ സ്ഥാനമുണ്ടായിരുന്നു. ആയ് രാജവംശത്തിന്റെ പ്രധാന തുറമുഖമായിരുന്നു വിഴിഞ്ഞം. തീരക്കടലില്‍ നിന്ന് 18 മീറ്റര്‍ മുതല്‍ 20 മീറ്റര്‍ വരെ പ്രകൃതി കനിഞ്ഞ് നല്‍കിയ സ്വാഭാവിക ആഴക്കടലാണ് വിഴിഞ്ഞത്തിന്റെ സവിശേഷത. അന്താരാഷ്ട്ര കപ്പല്‍ ചാലിനടുത്താണെന്നതാണ് മറ്റൊരു പ്രത്യേകത. വിഴിഞ്ഞം തുറമുഖത്തില്‍ നിന്ന് വെറും 11 നോട്ടിക്കല്‍ മൈല്‍ ദൂരത്തില്‍ മാത്രമാണ് അന്താരാഷ്ട്ര കപ്പല്‍ ചാനല്‍ കടന്നുപോകുന്നത്. മദര്‍ഷിപ്പ് അടക്കമുള്ള മുപ്പതോളം കപ്പലുകള്‍ക്ക് ഒരേസമയം നങ്കൂരമിടാനും തുറമുഖം പൂര്‍ത്തിയായാല്‍ കഴിയും. വിസ്തൃതമായ കണ്ടെയ്നര്‍ യാര്‍ഡ്, കപ്പലുകള്‍ക്ക് ഇന്ധനം നിറയ്ക്കാനുള്ള ബങ്കറിങ് യാര്‍ഡ്, കപ്പല്‍ ചാലില്‍ നിന്ന് കുറഞ്ഞ സമയംകൊണ്ട് തുറമുഖത്ത് എത്താനും തിരികെ പോകാനുമുള്ള സൗകര്യം എന്നിവ വിഴിഞ്ഞത്തിന് അനുകൂല ഘടകങ്ങളാണ്. വിഴിഞ്ഞം തീരത്തിനടുത്ത് അഴിമുഖങ്ങള്‍ ഇല്ലാത്തതും മറ്റൊരു പ്രത്യേകതയാണ്.

അന്താരാഷ്ട്ര ചാനല്‍വഴി സഞ്ചരിക്കുന്ന കപ്പലുകള്‍ക്ക് വിഴിഞ്ഞത്ത് തമ്പടിക്കുന്നതിനും ഇന്ധനം നിറയ്ക്കാനും കഴിയും. ഇതോടെ ഇന്ധന വ്യാപാര മേഖല ഉണരും. ചരക്കിറക്കാനും ചരക്ക് കയറ്റിക്കൊണ്ടു പോകാനും അടുക്കുന്ന കപ്പലുകള്‍ സൃഷ്ടിക്കുന്ന തൊഴില്‍ സാധ്യതകള്‍ വിപുലമായിരിക്കും. കപ്പലുകള്‍ക്കായി ഒട്ടേറെ ഓഫീസുകള്‍ തുറക്കാനും ഇവയുമായി ബന്ധപ്പെട്ട് ധനകാര്യ സ്ഥാപനങ്ങള്‍, വര്‍ക്ക് ഷോപ്പുകള്‍, ബാങ്കുകള്‍ എന്നിവയും പ്രവര്‍ത്തനമാരംഭിക്കും. കയറ്റിറക്കു വസ്തുക്കളുടെ വിപണനം, കൈമാറ്റം, ഗതാഗത മേഖല, വിനിമയരംഗം എല്ലാം തന്നെ സജീവമാകുമ്പോള്‍ അവയൊക്കെ വന്‍ തൊഴില്‍ സാധ്യതകളായിരിക്കും സൃഷ്ടിക്കുക. ഇതിനൊക്കെ പുറമേ വിദേശനാണ്യത്തിന്റെ ഒഴുക്ക് മറ്റൊരു സാധ്യതയാണ്. എല്ലാ അത്യന്താധുനിക സംവിധാനങ്ങളും വിഴിഞ്ഞത്തേക്കെത്തും. റോഡുകളും ചെറുപാതകളുമെല്ലാം വികസിക്കും. നിര്‍മ്മാണ പ്രവര്‍ത്തനങ്ങള്‍ ശക്തമാകും. ഒരു കപ്പല്‍ എത്ര ദിവസമാണോ തീരക്കടലില്‍ തങ്ങുക, അത്രയും വരുമാനം സംസ്ഥാനത്തിനുണ്ട്. ഒരു ദിവസം തന്നെ ചുരുങ്ങിയത് ഒരു ലക്ഷം രൂപയെങ്കിലും കപ്പലുകള്‍ ഇത്തരത്തില്‍ ഫീസായി സര്‍ക്കാരിന് നല്‍കണം. ഇത് സംസ്ഥാന സര്‍ക്കാരിന് ഒരു മുതല്‍ക്കൂട്ടാണ്.

Tags
Show More

Related Articles

Leave a Reply

Your email address will not be published.

Back to top button
Close