INDIANEWS

വഴിയരികിൽ കിടന്ന കാറിനുള്ളിൽ അധ്യാപകന്റെ മൃതദേഹം; നാല് ദിവസമെങ്കിലും പഴക്കമുണ്ടെന്ന് പോലീസ്; ദുരൂഹത

മേട്ടുപ്പാളയം: വഴിയരികിൽ കിടന്ന കാറിനുള്ളിൽ അധ്യാപകന്റെ മൃതദേഹം കണ്ടെത്തി. മേട്ടുപ്പാളയം- ഊട്ടി റോഡിൽ ബ്ലാക്ക് തണ്ടറിന് സമീപമാണ് കാർ കണ്ടെത്തിയത്. ഊട്ടി യെല്ലനല്ലി ചാത്തൂർ സ്വദേശി രഞ്ജിത്താണ് മരിച്ചത്. മൃതദേഹത്തിന് നാലു ദിവസമെങ്കിലും പഴക്കമുണ്ടെന്ന് പോലീസ് പറയുന്നു.

ബുധനാഴ്ച രാവിലെയാണ് ഒരാൾ കാറിനകത്തുള്ളത് കണ്ടെത്തിയത്. മേട്ടുപ്പാളയം പൊലീസെത്തി കാറിലുണ്ടായിരുന്ന തിരിച്ചറിയൽ കാർഡ് പരിശോധിച്ചപ്പോഴാണ് ആളെ അറിഞ്ഞത്. ഗൂഡല്ലൂർ മണ്ണൂത്ത് വയൽ സർക്കാർ സ്‌കൂളിൽ അധ്യാപകനാണ്. ഭാര്യയും ഒരു കുട്ടിയുമുണ്ട്. നാലുദിവസമായി കാർ റോഡരികിൽ കിടക്കുകയായിരുന്നുവെന്ന് അധികൃതർ പറഞ്ഞു.

മരണം നടന്ന് മൂന്നുദിവസമെങ്കിലും ആയിട്ടുണ്ടെന്ന് പൊലീസ് പറഞ്ഞു. മൃതദേഹം പോസ്റ്റ്‌മോർട്ടം നടപടികൾക്കായി കോയമ്പത്തൂർ മെഡിക്കൽ കോളേജ് ആശുപത്രിയിലേക്ക് മാറ്റി. അസ്വാഭാവിക മരണത്തിന് പൊലീസ് കേസെടുത്തു.

കൈ തല്ലിയൊടിച്ചത് ക്രീം ബണ്ണിൽ ക്രീം കുറവെന്ന് ആരോപിച്ച്; വിശദമായ അന്വേഷണത്തിനൊരുങ്ങി പോലീസ്

കോട്ടയം: ക്രീം ബണ്ണിൽ ക്രീം കുറവെന്നാരോപിച്ച് കടയുടമയുടെ കൈ തല്ലിയൊടിച്ച സംഭവത്തിൽ വിശദമായ അന്വേഷണത്തിനൊരുങ്ങി പോലീസ്. അതിന് ശേഷം തുടർനടപടികളിലേക്ക് കടക്കാനാണ് പോലീസ് തീരുമാനം. ബേക്കറി ഉടമയെ കൂടാതെ ചായ കുടിക്കാനെത്തിയ 95 കാരനായ വൃദ്ധനെയുമടക്കം അഞ്ചുപേരെയാണ് അക്രമിസംഘം ആക്രമിച്ചത്. ചൂടില്ലാത്ത ചായ വാങ്ങി കുടിച്ചതിനായിരുന്നു 95 കാരനായ വൃദ്ധനെ ഇവർ തല്ലിയത്.

ബുധനാഴ്ച വൈകീട്ട് 5 മണിയോടെയായിരുന്നു സംഭവം. വൈക്കം സർക്കാർ ആശുപത്രിക്ക് സമീപമുള്ള ബേക്കറിയിലാണ് നാടകീയ രംഗങ്ങൾ അരങ്ങേറിയത്. വൈകുന്നേരം അഞ്ച് മണിയോടെ കടയിൽ ചായ കുടിക്കാൻ എത്തിയവരും ബേക്കറി ഉടമയും തമ്മിൽ സംഘർഷമുണ്ടാവുകയായിരുന്നു. ആറംഗ സംഘമാണ് കടയിൽ അക്രമം നടത്തിയതെന്ന് ബേക്കറി ഉടമ പോലീസിന് മൊഴി നൽകി. വിശദമായ അന്വേഷണത്തിന് ശേഷം നടപടിയിലേക്കു കടക്കാനാണ് പോലീസ് തീരുമാനം.

ആറംഗ സംഘത്തിൽ ഒരാൾ ബണ്ണ് കഴിക്കുന്നതിനിടെ ക്രീം കുറവാണ് എന്ന് ബേക്കറി ഉടമയോട് പറഞ്ഞു. അസഭ്യവാക്കുകൾ ഉപയോഗിച്ചുകൊണ്ടാണ് ഇയാൾ ബേക്കറി ഉടമയോട് സംസാരിച്ചത്. തുടർന്ന്, ബേക്കറി ഉടമ ഇത് ചോദ്യം ചെയ്തതോടെ വാക്കേറ്റമുണ്ടായി. ഇതിനുശേഷമാണ് ആറംഗ സംഘം തങ്ങളെ ക്രൂരമായി മർദ്ദിച്ചത് എന്ന് ബേക്കറി ഉടമ ശിവകുമാർ പോലീസിന് മൊഴി നൽകി.

അക്രമത്തിൽ ബേക്കറി ഉടമ ശിവകുമാറിന്റെ ഭാര്യ കവിതയ്ക്കും മക്കളായ കാശിനാഥനും സിദ്ധിവിനായകനും മർദനമേറ്റു എന്നാണ് പരാതി. സംഭവത്തെ തുടർന്ന് ഇവർ വൈക്കം സർക്കാർ ആശുപത്രിയിൽ ചികിത്സ തേടി. ഇവർക്ക് മർദ്ദനമേറ്റതായി ആശുപത്രി അധികൃതരും സ്ഥിരീകരിക്കുന്നു.

അതേസമയം, ബേക്കറി ഉടമയാണ് തങ്ങളെ മർദ്ദിച്ചത് എന്നാരോപിച്ച് ആറംഗസംഘം പൊലീസിന് പരാതി നൽകി. വൈക്കത്തിനു സമീപം പാലാംകടവ് സ്വദേശികളായ യുവാക്കളാണ് പോലീസിനെ സമീപിച്ചത്. സംഭവത്തിൽ അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് കടക്കും. ദൃക്സാക്ഷികളുടെ മൊഴി കൂടി രേഖപ്പെടുത്തി നടപടി സ്വീകരിക്കാനാണ് പൊലീസ് തീരുമാനം.

ശിവകുമാറിനെ ആക്രമിക്കുന്നത് തടയാനെത്തിയപ്പോഴാണ് ഭാര്യ കവിതക്കും മക്കളായ കാശിനാഥനും സിദ്ധിവിനായകനും മർദനമേറ്റതെന്നാണ് പരാതി. കവിതയുടെ കഴുത്തിന് കുത്തിപ്പിടിച്ച് കൈവിരൽ ഒടിച്ചതായും പരാതിയുണ്ട്. അതിനിടെ കടയിൽ ചായ കുടിച്ചുകൊണ്ടിരുന്ന ആലുങ്കൽ വേലായുധൻ എന്ന 95 വയസുകാരനും സംഘർഷത്തിൽ പരുക്കേറ്റു. വീഴ്ചയിൽ ഇയാളുടെ നട്ടെല്ലിനടക്കം പരിക്ക് പറ്റിയതായാണ് പൊലീസ് പറയുന്നത്.

സംഘർഷത്തിൽ കടയിലും വലിയ നാശനഷ്ടം ഉണ്ടായിട്ടുണ്ട്. ഇവിടെ ഉണ്ടായിരുന്ന നിരവധി സാധനങ്ങൾ അക്രമികൾ തല്ലിത്തകർത്തു. ദൃക്സാക്ഷികളുടെ മൊഴി രേഖപ്പെടുത്തി പൊലീസ് അന്വേഷണത്തിന് തുടക്കമിട്ടു. ഇരു വിഭാഗത്തിലെ പരാതികളും ഗൗരവമായിത്തന്നെ പരിശോധിക്കുമെന്ന് വൈക്കം പോലീസ് വ്യക്തമാക്കി.

അടുത്തിടെ ഗൗരവമേറിയ ശസ്ത്രക്രിയ കഴിഞ്ഞ വിശ്രമത്തിലായിരുന്നു താനെന്ന് കവിത പൊലീസിന് മൊഴി നൽകിയിട്ടുണ്ട്. യുവാവ് അസഭ്യം പറഞ്ഞു അക്രമത്തിന് ശ്രമിച്ചപ്പോൾ താൻ അനുനയിപ്പിക്കാൻ ശ്രമം നടത്തിയതായി കവിത പോലീസിനോട് പറഞ്ഞു.

എന്നാൽ കുഞ്ഞുങ്ങളോട് പോലും കരുണ കാട്ടാതെയുള്ള അക്രമമാണ് യുവാക്കൾ നടത്തിയത് എന്നാണ് ഇവർ പോലീസിന് നല്കിയിരിക്കുന്ന മൊഴി. നിസാര സംഭവങ്ങൾ ചൊല്ലിയുണ്ടായ അക്രമത്തിന്റെ ഞെട്ടലിലാണ് പ്രദേശവാസികൾ. സംഭവത്തിൽ വൈകാതെ അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് കടന്നേക്കും. പ്രദേശത്ത് സി.സി.ടി.വി. ക്യാമറ ഉൾപ്പെടെയുള്ളവ ഉണ്ടോയെന്നും പോലീസ് പരിശോധിച്ച് വരികയാണ്.

Tags
Show More

Related Articles

Leave a Reply

Your email address will not be published.

Back to top button
Close