KERALANEWS

മലയാളത്തിലേക്ക് മൊഴിമാറ്റിയത് 107 കൃതികൾ; തർജമ ചെയ്തുകൊണ്ട് എം.പി. സദാശിവൻ ഗിന്നസിലേക്ക്

തിരുവനന്തപുരം: കൃതികൾ പരിഭാഷപ്പെടുത്തി റെക്കോർഡുകൾ സൃഷ്ടിച്ചിരിക്കുകയാണ് എം.പി. സദാശിവൻ. വിവിധ ഭാഷകളിൽനിന്ന് ഇദ്ദേഹം മലയാളത്തിലേക്ക് പരിഭാഷപ്പെടുത്തിയത് 107 കൃതികളാണ്. ഇംഗ്ലീഷിൽ നിന്നാണ് കൂടുതലും വിവർത്തനം നടത്തിയത്. കൂടാതെ തമിഴ്, ഹിന്ദി ഭാഷകളിലെ കൃതികളും എംപി സദാശിവൻ മൊഴിമാറ്റി മലയാളത്തിൽ പ്രസിദ്ധീകരിച്ചിട്ടുണ്ട്. വഴുതക്കാട് വനംവകുപ്പ് ആസ്ഥാനത്തിന് സമീപം ഡി-27 പദ്മരാഗത്തിൽ ഏജീസ് ഓഫീസിൽനിന്ന് സീനിയർ ഓഡിറ്റ് ഓഫീസറായി വിരമിച്ച ഇദ്ദേഹം മറ്റുഭാഷകളിലെ കൃതികൾ അതിന്റെ യഥാർത്ഥ സത്ത ചോർന്നുപോകാതെ മലയാളത്തിലേക്ക് വിവർത്തനം ചെയ്യുന്നു.

വിവർത്തനം ചെയ്ത കൃതികൾ കൂടാതെ സ്വന്തം രചനകളായി 13 കൃതികളുമുണ്ട്. ബൃഹദ്‌ഗ്രന്ഥങ്ങളുൾപ്പെടെ പരിഭാഷ ചെയ്ത പേജുകൾ കണക്കാക്കിയാൽ 45,000 അച്ചടിപേജുകൾ ഉണ്ട്. നോവൽ, കവിത, ചെറുകഥ, ബാലസാഹിത്യം, ജ്യോതിഷം, വാസ്തുശാസ്ത്രം, ജീവചരിത്രം, നിയമം, സാമ്പത്തികശാസ്ത്രം തുടങ്ങി വിവിധ മേഖലകളിലെ ഗ്രന്ഥങ്ങൾ എംപി സദാശിവൻ വിവർത്തനം ചെയ്ത കൃതികളിൽ പെടും. ദിവസവും 50 പേജുകൾവരെ ഇദ്ദേഹം ഉറപ്പായും വിവർത്തനം ചെയ്യും. വിവർത്തനത്തിലൂടെ ലിംകാ ബുക്ക് ഓഫ് റെക്കോഡ്‌സിൽ എംപി സദാശിവൻ ഇടം നേടി.

സദാശിവനിലെ വിവർത്തകനെ കണ്ടെത്തിയത് ഡി.സി. കിഴക്കേമുറിയാണ്. ഷെർലക് ഹോംസിലെ ചെമ്പൻമുടിക്കാർ എന്ന കൃതിയിലൂടെയായിരുന്നു ഇദ്ദേഹം വിവർത്തന രംഗത്തേക്ക് കാലെടുത്ത് വെക്കുന്നത്. വെറും 6 ദിവസംകൊണ്ട് കെ.ആർ. നാരായണന്റെ ‘ഇമേജസ് ആൻഡ് ഇൻസൈറ്റ്’ എന്ന കൃതിയുടെ 200 പേജുള്ള ‘ഉൾക്കാഴ്ചകൾ’ എന്ന പുസ്തകം സദാശിവൻ പൂർത്തിയാക്കിയത്. ‘ഇമേജസ് ആൻഡ് ഇൻസൈറ്റ്’ എന്ന പുസ്തകം വിവർത്തനം ചെയ്യാമെന്ന് ഏറ്റയാൾ പിന്മാറിയതോടെ സദാശിവനെ ഇതിനായി ചുമതലപ്പെടുത്തുകയായിരുന്നു ഡി.സി. കിഴക്കേമുറി. അന്നത്തെ രാഷ്ട്രപതിയായിരുന്ന കെ.ആർ. നാരായണൻ പങ്കെടുക്കുന്ന പ്രകാശനത്തീയതി അടുത്തതിനാൽ 6 ദിവസം കൊണ്ട് ഇദ്ദേഹം കൃതി പൂർത്തീകരിക്കുവായിരുന്നു.

അമർത്യസെൻ, അരുന്ധതി റോയ്, ഡോ. ശശി തരൂർ, നോം ചോംസ്‌കി, ഗ്യാനി സെയിൽസിങ്, എ.പി.ജെ. അബ്ദുൽകലാം, ടി.എൻ. ശേഷൻ, ഖുശ്വന്ത് സിങ് തുടങ്ങിയവരുടെ പുസ്തകങ്ങൾ സദാശിവൻ വിവർത്തനം ചെയ്തിട്ടുണ്ട്. താൻ എട്ടുമാസംകൊണ്ട് പൂർത്തിയാക്കിയ ആയിരത്തൊന്നു രാവുകളാണ് ഏറ്റവും മികച്ച വിവർത്തന കൃതി എന്ന് അദ്ദേഹം പറയുന്നു. കോവിഡ് കാലത്ത് രചിച്ച ‘പെണ്ണരശ് നാട്ടിലെ ഒരു കുടുംബപുരാണം’ എന്ന നോവലാണ് ഇനി പ്രസിദ്ധീകരിക്കാനുള്ള അദ്ദേഹത്തിന്റെ കൃതി. കന്യാകുമാരി ജില്ലയിലെ കാട്ടാത്തുറയിൽ ജനിച്ച സദാശിവൻ ജന്മനാടിന്റെ ചരിത്രം, സമൂഹം എന്നിവയുടെ പശ്ചാത്തലത്തിലാണ് ഈ പുസ്തകം രചിച്ചിരിക്കുന്നത്. കേരള സാഹിത്യ അക്കാദമി, ബാലസാഹിത്യ അവാർഡ്, കേരള ഭാഷാ ഇൻസ്റ്റിറ്റ്യൂട്ട് എന്നിവയുടെ പുരസ്കാരവും കേന്ദ്ര സർക്കാർ സാംസ്കാരിക വകുപ്പിന്റെ സീനിയർ ഫെലോഷിപ്പും സദാശിവന് ലഭിച്ചിട്ടുണ്ട്.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close