INDIANEWSTrending

‘സ്വാതന്ത്ര്യ സമര സേനാനികളെ ബ്രിട്ടീഷുകാർ തൂക്കിലേറ്റിയപ്പോൾ പല നേതാക്കളും വെറും കാഴ്ചക്കാരായിരുന്നു’; കങ്കണ റണാവത്തിന് പിന്തുണയുമായി വിക്രം ഗോഖലെ

വിവാദ പരാമർശം നടത്തിയ കങ്കണയ്ക്ക് പിന്തുണയുമായി നാടക പ്രവർത്തകനും നടനുമായ വിക്രം ഗോഖലെ. ഇന്ത്യയുടെ സ്വാതന്ത്ര്യം സംബന്ധിച്ച് ചലച്ചിത്രനടി കങ്കണ നടത്തിയ വിവാദ പരാമർശത്തെ പിന്തുണച്ചുകൊണ്ടാണ് മറാത്ത നടനായ വിക്രം ഗോഖലെ രംഗത്തെത്തിയിരിക്കുന്നത്. മഹാരാഷ്ട്രയിൽ നടന്ന പരിപാടിക്കിടെയായിരുന്നു നടന്റെ പരാമർശം.

കങ്കണയുടെ പരാമർശത്തോട്​ ഞാൻ യോജിക്കുന്നുവെന്നാണ് വിക്രം ഗോഖലെ പറഞ്ഞത്. നമുക്ക് സ്വാതന്ത്ര്യം ലഭിച്ചു എന്നാൽ ബ്രിട്ടീഷ് ഭരണകാലത്ത് സ്വാതന്ത്ര്യ സമര സേനാനികളെ തൂക്കിലേറ്റിയപ്പോൾ പലരും വെറും കാഴ്ചക്കാരായിരുന്നുവെന്നും അവരിൽ പല മുതിർന്ന നേതാക്കളും ഉണ്ടായിരുന്നുവെന്നും ഗോഖലെ പറയുന്നു. ബ്രിട്ടീഷുകാർക്കെതിരെ പോരാടിയ സ്വാതന്ത്ര്യ സമര സേനാനികളെ അവർ രക്ഷിച്ചില്ലെന്നും ഗോഖലെ പറഞ്ഞു.

ത്രിപുരയിലെ വർഗീയ കലാപങ്ങളെ തുടർന്ന്​ മഹാരാഷ്​ട്രയിൽ അരങ്ങേറുന്ന അക്രമ സംഭവങ്ങളെക്കുറിച്ചും ഗോഖലെ പ്രതികരിച്ചു. വോട്ടുബാങ്ക്​ രാഷ്​ട്രീയത്തിന്‍റെ ഫലമാണ്​ വർഗീയ ലഹളകളെന്ന് പറഞ്ഞ ഗോഖലെ, രാജ്യത്തിന്‍റെ പുരോഗതിക്കായി ബി.ജെ.പിയും ശിവസേനയും വീണ്ടും ഒരുമിക്കണമെന്നും ആവശ്യപ്പെട്ടു.

‘1947ൽ ഇന്ത്യക്ക് ലഭിച്ചത് സ്വാതന്ത്ര്യമായിരുന്നില്ല. ഭിക്ഷയായിരുന്നു. രാജ്യത്തിന് യഥാർഥത്തിൽ സ്വാതന്ത്ര്യം കിട്ടിയത് 2014ലാണ്’ എന്നായിരുന്നു കങ്കണയുടെ വിവാദ പ്രസ്താവന. അതേസമയം നടി കങ്കണ റണാവത്തിന്​ നൽകിയ പത്മശ്രീ തിരിച്ചെടുക്കണമെന്നാവശ്യപ്പെട്ട് ​രാഷ്​ട്രപതിക്ക്​ ഡൽഹി വനിത കമ്മീഷൻ അധ്യക്ഷയുടെ​ കത്ത്. ഇന്ത്യയുടെ സ്വാതന്ത്ര്യവുമായി ബന്ധപ്പെട്ട്​ കങ്കണ നടത്തിയ വിവാദ പരാമർശത്തിന്​ പിന്നാലെയാണ് നടപടി.

ഇന്ത്യയുടെ സ്വാതന്ത്ര്യത്തെ ഭിക്ഷയായി വിശേഷിപ്പിച്ച കങ്കണക്കെതിരെ രാജ്യദ്രോഹത്തിന് കേസെടുക്കണമെന്നാണ് ഡി.സി. ഡബ്ല്യു അധ്യക്ഷ സ്വാതി മാലിവാള്‍ കത്തില്‍ ആവശ്യപ്പെട്ടിരിക്കുന്നത്. കങ്കണയുടെ മാനസിക നില തെറ്റാണെന്നും ഇതൊരു ഒറ്റപ്പെട്ട സംഭവമല്ലെന്നും അവര്‍ ചൂണ്ടിക്കാട്ടി. തനിക്ക് വിയോജിപ്പുള്ളവരെ മോശമായ ഭാഷയിൽ ആക്രമിക്കുന്ന കങ്കണ, സ്വന്തം രാജ്യത്തെ ജനങ്ങൾ​ക്കുനേരെ വിഷം ചീറ്റാറുണ്ടെന്നും കത്തില്‍ പറയുന്നു. മഹാത്മാ ഗാന്ധി, ഭഗത് സിങ്​ തുടങ്ങി നമ്മുടെ രാജ്യത്തിനായി ജീവൻ ബലിയർപ്പിച്ച എണ്ണമറ്റ മറ്റു സ്വാതന്ത്ര്യ സമര സേനാനികളോടുമുള്ള കങ്കണയുടെ വെറുപ്പാണ് പ്രസ്താവനയിൽ പ്രതിഫലിക്കുന്നതെന്നും സ്വാതി മാലിവാള്‍ കൂട്ടിച്ചേര്‍ത്തു. ഇത് ദശലക്ഷക്കണക്കിന് ഇന്ത്യക്കാരുടെ വികാരത്തെ വ്രണപ്പെടുത്തുമെന്നും ചൂണ്ടികാണിച്ചു.

വിവാദ പ്രസ്താവനക്ക് പിന്നാലെ പത്മശ്രീ പുരസ്‌കാരം തിരിച്ചെടുക്കണമെന്ന് ആവശ്യപ്പെട്ട് വിവിധ രാഷ്ട്രീയ പാർട്ടി നേതാക്കളും സാംസ്‌കാരിക പ്രവർത്തകരും രംഗത്തെത്തിയിരുന്നു. സ്വാതന്ത്ര്യത്തിന്റെ എഴുപത്തിയഞ്ചാം വാർഷികത്തിൽ ടൈംസ് നൗ സംഘടിപ്പിച്ച സമ്മിറ്റിൽ സംസാരിക്കവെയായിരുന്നു പരാമര്‍ശം.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close