KERALANEWSTop NewsTrending

‘ഇപ്പോൾ ഒരു മറുപടിയായി’; ‘ദുരന്തമുഖങ്ങളിൽ തലകാണിക്കാനെത്തുന്ന രാഷ്ട്രീയക്കാർ നൽകുന്നതെല്ലാം വാഗ്ദാനങ്ങൾ മാത്രമായി ഒടുങ്ങും’; വെറും വാക്ക് നൽകുന്ന രാഷ്ട്രീയ നേതാക്കൾക്കെതിരെ ശക്തമായ ഭാഷയിൽ പ്രതികരിച്ച് അനിൽ പനച്ചൂരാന്റെ ഭാര്യ മായയുടെ ഫേസ്ബുക്ക് കുറിപ്പ്

വാഗ്ദാനങ്ങൾ മാത്രം നൽകി മടങ്ങുന്ന രാഷ്ട്രീയ നേതാക്കൾക്കെതിരെ ശക്തമായ പ്രതികരണവുമായി അനിൽ പനച്ചൂരാന്റെ ഭാര്യ മായയുടെ ഫേസ്ബുക്ക് പോസ്റ്റ്. ദുരന്തമുഖങ്ങളിൽ എത്തുന്ന നേതാക്കൾ നൽകുന്ന വാഗ്ദാനങ്ങളെല്ലാം വാഗ്ദാനങ്ങളായി മാത്രം ഒടുങ്ങിപ്പോവുകയേ ഉള്ളുവെന്ന് മായ പറയുന്നു. ശാന്തമായി എഴുതിയ കുറിപ്പിലൂടെ ശക്തമായ പ്രതികരണമാണ് മായ നടത്തിയിരിക്കുന്നത്. മായയുടെ ജോലി സംബന്ധിച്ച് ഒരുപാട് പേർ വിളിക്കാറുണ്ടെന്നും എന്നാൽ അവരോട് പറയാൻ ഒരു മറുപടി പോലുമില്ലായിരുന്നെന്നും കുറിപ്പിൽ വ്യക്തമാക്കുന്നു. എന്നാലിപ്പോൾ ഒരു മറുപടി ആയെന്ന് പറഞ്ഞാണ് കുറിപ്പ് പങ്കുവെച്ചിരിക്കുന്നത്.

കുറിപ്പിന്റെ പൂർണ്ണ രൂപം

നമസ്തേ
അനിചേട്ടനെയും എന്നേയും സ്നേഹിക്കുന്ന, ഇപ്പോഴും അനിൽ പനച്ചൂരാനെ ഓർമിക്കുന്ന ധാരാളം പേർ പലപ്പോഴും വിളിച്ചു തിരക്കാറുണ്ട്, ‘ജോലി വലതുമായോ ‘ എന്ന്. അത്തരം കോളുകൾ ഒന്നും തന്നെ ഞാൻ ഇപ്പോൾ attend ചെയ്യാറില്ല. കാരണം നല്ല വാർത്തകൾ ഒന്നും തന്നെ എനിക്കവരോടു പറയാനില്ല !
ആ ഒരു സമയത്ത് എല്ലാ രാഷ്ട്രീയ പാർട്ടികളുടെയും നേതാക്കന്മാർ ഈ വീട്ടിൽ കയറിയിറങ്ങിയതും പലതരത്തിലുള്ള വാഗ്ദാനങ്ങൾ നൽകിയതും പല മാധ്യമങ്ങളിലൂടെ എല്ലാവരും അറിഞ്ഞതാണ്. അത്തരം വാർത്തകൾ ഒന്നും തന്നെ ഞാനായിട്ട് പൊതുവേദികളിൽ പരസ്യപ്പെടുത്തിയിട്ടില്ല. എന്നിരുന്നാലും കായംകുളം MLA ശ്രീമതി. പ്രതിഭ ഉൾപ്പടെയുള്ള പ്രമുഖർ കവിയുടെ കുടുംബത്തിന് ആനുകൂല്യങ്ങൾ ലഭ്യമാക്കുമെന്ന് പല വേദികളിലും പ്രസംഗിച്ചത് ( ശ്രീമതി പ്രതിഭ അനുശോചന യോഗങ്ങളിൽ പൊട്ടികരഞ്ഞതും ) എന്റെ ശ്രദ്ധയിലും പെട്ടിരുന്നു.
അനിൽ പനച്ചൂരാനെ സ്നേഹിക്കുന്ന, ഞങ്ങളുടെ ദൗർഭാഗ്യങ്ങളിൽ വേദനിക്കുന്ന ആയിരക്കണക്കിനാളുകൾ ഉണ്ടെന്നറിയാം. അവരോട് എന്തു പറയണം എന്നറിയില്ലായിരുന്നു…( എന്റെ ജോലിയുമായി ബന്ധപ്പെട്ട വാർത്തകളുടെ സത്യാവസ്ഥ പറഞ്ഞുപറഞ്ഞു ഞാൻ തന്നെ മടുത്തിരുന്നു ) ഇപ്പോൾ ഒരു മറുപടിയായി. അത് ഇവിടെ സമർപ്പിക്കുന്നു. എല്ലാവരുടെയും പ്രാർത്ഥനയിൽ ഞങ്ങളെ ഓർക്കണമെന്ന് അപേക്ഷിക്കുന്നു. ഒപ്പം ഒരു വാക്ക് കൂടി… ദുരന്തമുഖങ്ങളിൽ തലകാണിക്കാൻ രാഷ്ട്രീയക്കാർ എത്തുന്ന വാർത്തകൾ നമ്മൾ നിരന്തരം കാണാറുണ്ട്;വാഗ്ദാനങ്ങൾ നൽകുന്നത് പത്രമാധ്യമങ്ങളിൽ കൂടി അറിയാറുണ്ട്. ഇതെല്ലാം വെറും വാഗ്ദാനങ്ങളായി ഒടുങ്ങുകയേ ഉള്ളു. അതുകൊണ്ട് ദയവു ചെയ്ത് ഇത്തരം വാർത്തകൾ വിശ്വസിക്കരുത്.

മായ പനച്ചൂരാൻ

Tags
Show More

Related Articles

Leave a Reply

Your email address will not be published. Required fields are marked *

Back to top button
Close