Breaking NewsINDIANEWS

കസ്റ്റഡിയിലെടുത്ത നേതാക്കളെ മോചിപ്പിക്കാൻ സ്റ്റേഷന് മുന്നിൽ തടിച്ചുകൂടിയത് നൂറുകണക്കിന് പോപ്പുലർ ഫ്രണ്ട് പ്രവർത്തകർ; സന്ധ്യ കഴിഞ്ഞതോടെ മൂർച്ചയേറിയ ആയുധങ്ങളുമായി സ്റ്റേഷനിലേക്ക് കടക്കാൻ ശ്രമം; ഉപ്പിനങ്ങാടിയിലെ സംഘർഷത്തിൽ പരിക്കേറ്റത് പൊലീസ് ഉദ്യോ​ഗസ്ഥർ ഉൾപ്പെടെ നിരവധി പേർക്ക്

മംഗളൂരു: മംഗളുരു ഉപ്പിനങ്ങാടിയിൽ പോപുലർ ഫ്രണ്ട് – എസ്ഡിപിഐ പ്രവർത്തകർ പൊലീസ് സ്റ്റേഷൻ ആക്രമിച്ചു. സംഘർഷത്തെ തുടർന്ന് മൂന്ന് പൊലീസുകാർ ഉൾപ്പെടെ നിരവധി പേർക്ക് പരിക്കേറ്റു. പൊലീസ് കസ്റ്റഡിയിൽ എടുത്ത എസ് ഡി പി ഐ പ്രാദേശിക നേതാക്കളെ മോചിപ്പിക്കുന്നതിന് വേണ്ടിയായിരുന്നു പ്രവർത്തകർ സംഘടിച്ചെത്തിയത്.

ഉപ്പിനങ്ങാടി പൊലീസ് സ്റ്റേഷന് എതിർവശത്ത് പ്രകടനം നടത്തിയ ജനക്കൂട്ടം അക്രമാസക്തമാവുകയും പൊലീസിനെതിരെ മുദ്രാവാക്യം വിളിക്കുകയും മൂർച്ചയേറിയ ആയുധങ്ങളുമായി സ്റ്റേഷനിലേക്ക് കടക്കാൻ ശ്രമിക്കുകയും ചെയ്യുകയായിരുന്നു എന്നാണ് പൊലീസ് പറയുന്നത്. സമീപത്ത് പാർക്ക് ചെയ്തിരുന്ന ആംബുലൻസിൽ നിന്ന് പ്രവർത്തകരിൽ ചിലർ ആയുധങ്ങളും ഒഴിഞ്ഞ സോഡ കുപ്പികളും എടുത്ത് ആക്രമിക്കുകയും കല്ലെറിയുകയും വാഹനങ്ങളും മറ്റ് പൊതു സ്വത്തുക്കളും നശിപ്പിക്കുകയും ചെയ്തു. ഇവരെ ഓടിക്കാൻ ലാത്തിച്ചാർജ് നടത്തുകയല്ലതെ മറ്റു വഴിയുണ്ടായിരുന്നിട്ടില്ലെന്നാണ് പൊലീസ് പറയുന്നത്.

സംഭവവുമായി ബന്ധപ്പെട്ട് മൂന്ന് കേസുകൾ രജിസ്റ്റർ ചെയ്തിട്ടുണ്ട്. കുറ്റവാളികളെ കണ്ടെത്താനുള്ള ദൗത്യം പുരോഗമിക്കുകയാണ്. പരിക്കേറ്റവരിൽ സമരം നയിച്ച സയ്യിദ് ആതൂർ തങ്ങളും ഉൾപെടുന്നുണ്ട് .പ്രദേശത്ത് 144 പ്രഖ്യാപിച്ച പശ്ചാത്തലത്തിൽ ബുധനാഴ്ച ഉപ്പിനങ്ങാടി നഗരം സാധാരണ നിലയിലേക്ക് വരികയാണ്. മുൻകരുതൽ നടപടികളുടെ ഭാഗമായി വിവിധ സ്ഥലങ്ങളിൽ പൊലീസിനെ വിന്യസിച്ചിട്ടുണ്ട്.

കഴിഞ്ഞ ദിവസം എസ്ഡിപിഐ പ്രാദേശിക നേതാക്കളെ പൊലീസ് കസ്റ്റഡിയിലെടുത്തിരുന്നു. തൊട്ടുപിന്നാലെ നിരവധി പിഎഫ്‌ഐ, എസ്ഡിപിഐ പ്രവർത്തകർ സ്റ്റേഷനു മുന്നിൽ തടിച്ചുകൂടി അറസ്റ്റിലായവരെ വിട്ടയക്കണമെന്നാവശ്യപ്പെട്ടു. തുടർന്ന് ഡിവൈഎസ്‌പി ഡോ.ഗണകുമാർ സമരക്കാരുമായി സംസാരിക്കുകയും അറസ്റ്റ് ചെയ്തവരെ വിട്ടയക്കാമെന്ന് ഉറപ്പ് നൽകുകയും ചെയ്തതിനെ തുടർന്ന് പ്രതിഷേധക്കാർ പിരിഞ്ഞുപോയി. എന്നാൽ ഒരാളെ മാത്രം പൊലീസ് വിട്ടയച്ചപ്പോൾ മറ്റുരണ്ടുപേരെ കൂടി ഉടൻ വിട്ടയക്കണമെന്ന് ആവശ്യപ്പെട്ട് പ്രതിഷേധക്കാർ വീണ്ടും രാത്രി പൊലീസ് സ്റ്റേഷന് പുറത്ത് തടിച്ചുകൂടുകയായിരുന്നു. ഇതിനിടെ പ്രവർത്തകർ അക്രമാസക്തരായി. തുടർന്ന് രാത്രി ഒമ്പത് മണിയോടെ ജനക്കൂട്ടത്തെ പിരിച്ചുവിടാൻ പൊലീസ് ലാത്തിചാർജ് നടത്തുകയായിരുന്നു.

അതേസമയം, പൊലീസ് തങ്ങളെ നിഷ്ഠുരമായി വേട്ടയാടുകയായിരുന്നെന്നാണ് പോപ്പുലർ ഫ്രണ്ട് പ്രവർത്തകർ പറയുന്നത്. ലാത്തിചാർജിനെ തുടർന്നുണ്ടായ പരിക്കുകളുടെ ഭീകരമായ വ്യാപ്തി പരിശോധിക്കുമ്പോൾ പ്രതിഷേധക്കാർക്ക് നേരെ പൊലീസ് വടി അല്ലാതെ മറ്റ് ആയുധങ്ങൾ ഉപയോഗിച്ചിരിക്കാമെന്ന് സംശയിക്കാൻ കാരണങ്ങളുണ്ടെന്നും നേതാക്കൾ പറയുന്നു. നിരപരാധികളെ നിയമവിരുദ്ധമായി അറസ്റ്റ് ചെയ്യുകയും ഇതിനെതിരെ സമാധാനപരമായി പ്രകടനം നടത്തിയ സമരക്കാർക്ക് നേരെ ക്രൂരമായി ലാത്തിചാർജ് നടത്തുകയായിരുന്നെന്നും എസ്ഡിപിഐ നേതാക്കൾ ആരോപിച്ചു.

Tags
Show More

Related Articles

Leave a Reply

Your email address will not be published. Required fields are marked *

Back to top button
Close